Келесі айдан бастап семейлік тұрғындар жылу мен ыстық суға жаңа тариф бойынша төлем жасайтын болады. Бұл туралы Семей қаласы әкімінің орынбасары Николай Ушаковтың жетекшілігімен, ТҮКШ бөлімінің басшысы Марат Аленов пен «Теплокоммунэнерго» МКМ-нің жетекшісі Нұржан Зейнуллиннің қатысуымен өткен баспасөз мәслихатында мәлім болды.
Жаңа тарифке сәйкес, жылудың бір гигакалориясы орташа есеппен алғанда 4659 теңгені құрайды. Заңды тұлғалар жылуға ай сайын 6680 теңге төлесе, қарапайым тұрғындар үшін тариф бағасы 3523 теңге шамасында. Бұл Табиғи монополияларды реттеу және бәсекелестікті қорғау жөніндегі комитеттің ШҚО бойынша департаментінің 2020 жылға дейінгі ұзақ мерзімді тариф шеңберінде жасалған жоспарлы қадам екенін атап өту керек. Алдағы үш жыл ішінде жылу жүйесінің тарифі өсіп отырады. Мәселен, келесі жылы жылу тарифі орташа есеппен тағы 4,5 пайызға, 2019 жылы тағы да 2,7 пайызға өседі. «Теплокоммунэнерго» МКМ-нің қаржылық жағдайы соңғы жылдары біршама жақсарған. Үкімет бөлген қомақты қаржы көмегімен жылдар бойы қаржылық мәселелері қордаланған мекеме жуырда дағдарыстан шықты. Бүгінде жылу берушілер алдындағы халықтың берешегі 199 млн. 800 мың теңге көлемінде. Оның 20 млн-нан астамы заңды тұлғаларға тиесілі. Борышкерлермен күрес жұмыстары жүргізіліп, нәтижесінде 2625 іс сот орындаушыларға жіберілген.
Қазіргі күні әлеуметтік маңызға ие нысандардан бөлек, орталықтандырылған жылу жүйесіне қаладағы 1069 тұрғын үй қосылған. Қатты аяз кезінде баспаналарды жылумен қамтуға тартылатын қосымша жылу қазандықтары да сақадай сай деп сендірді Семей қаласы тұрғын үй-коммуналдық шаруашылық бөлімінің басшысы Марат Аленов. Қалада пәтер иелері кооперативі ұйымдастырылмаған, жылу маусымына дайындық құжаттары жасалмаған тұрғын үйлер де бар. Мұндай жағдайда «Теплокоммунэнерго» мекемесінің мамандары үй тұрғындарына олқылықтың орнын толтырып, мәселенің мән-жайын суық түспей тұрып анықтауға кеңес берді.
Жібек СЕРҒАЗЫ, «Семей таңы»
