25 қазан күні Семей қалалық әкімдігінде қала әкімі Ермак Сәлімов сот төрағаларын марапаттады. Айта кетейік, Семей қаласындағы төрт сот төрағасының жемісті еңбектері еленіп, қызмет шендері көтерілді. Мемлекет басшысының 2017 жылғы 20 қазандағы «Қазақстан Республикасы соттарының төрағаларын, сот алқалары төрағалары мен судьяларын қызметке тағайындау және қызметтен босату туралы» №564 Жарлығына сәйкес, Семей қалалық сотының төрағасы Төленді Қасымов ШҚО мамандандырылған ауданаралық экономикалық сотының, Семей гарнизоны әскери сотының төрағасы Асқарбек Жүнісбеков Өскемен гарнизоны әскери сотының, ШҚО №2 кәмелетке толмағандардың істері жөніндегі мамандандырылған ауданаралық сот төрағасы Ринат Ақпар Алматы облысы Талдықорған гарнизоны әскери сотының төрағасы лауазымдарына тағайындалды. Сондай-ақ ҚР Президентінің 2017 жылғы 22 қыркүйектегі №551 Жарлығына сәйкес, №2 Семей қалалық сотының төрағасы Дәулетбек Бұлғынбаев ШҚО Өскемен қаласының мамандандырылған әкімшілік сотының төрағасы болып тағайындалды.
— Елбасы Жарлығына сәйкес, 2002 және 2007 жылдары Семей қаласының №2 сотының төрағасы болдым. 2008 жылдан бастап Семей гарнизоны әскери сотының төрағасы лауазымын атқарып келдім. Осы уақытқа дейін Елбасы Жарлығымен Семей қаласына 4 рет төраға болып тағайындалыппын. Елбасы сенімін ақтай отырып, заң саласындағы қажырлы еңбегімді адал жалғастыра беремін,- деді Өскемен гарнизоны әскери сотының төрағасы қызметіне тағайындалған Асқарбек Жүнісбеков.
Жиын барысында қала әкімі Ермак Сәлімов төрағаларды жаңа лауазымдарымен құттықтап, алдағы еңбектеріне жеміс тіледі.
Жадыра ТӨЛЕГЕНҚЫЗЫ, «Семей таңы»
