Жұма, 27 қазан күні қала әкімі Ермак Сәлімов жолаушылар тасымалдаушыларымен кездесу өткізді. Кездесуге сондай-ақ қалалық мәслихаттың хатшысы Бейсенбек Ақжалов, жолаушылар көлігі және автомобиль жолдары бөлімінің басшысы Серіққали Жұманов және «Семей қаласының жолаушылар тасымалын басқару орталығы» ЖШС директоры Бейсенғазы Тастекеев қатысты.
Семейде қазіргі уақытта 35 автобус пен 15 шағын автобус жолаушылар тасымалымен айналысады. Негізгі жеті тасымалдаушы мекеме бар: «Семавтопарк» ЖШС, «Азия комби» ЖШС, «Автомигди» ЖШС, «Таксомоторный парк» ЖШС, «Семдортехника-2» ЖШС, «Семей көлігі» ЖШС және ЖК «Мусапиров».
Келісімшарт бойынша, күнделікті 420 қоғамдық көлік жолаушылар тасымалымен айналысуы шарт. Алайда, жолаушыларға жүйелі қызмет етпегені үшін, №№ 5, 37, 8, 10 және 45 автобустарға қатысты экономикалық соттың шешімі шығып, басқа мердігер мекеме тағайындалды. Сондай-ақ№№ 22, 24, 43 автобустарға қатысты да тұрғындар наразылығы байқалған.
Қоғамдық көліктің жүру кестесі соңғы рет 2013 жылы бекітілген болатын. Бұл кестеге орай, қоғамдық көліктер жазғы және қысқы маусымға сай қызмет етеді. Ал биылғы жылдың 17 маусымынан бастап жазғы кестенің уақыты 23.00-ге дейін ұзарса, қазан айынан бастап барлық қоғамдық көліктер, қысқы кестеге сай, 21.00-ге дейін жүріп-тұруды бастады.
Биылғы жылы жолаушылар тасымалын қамтитын 23 шақырым жол жөндеуден өтсе, келесі жылы 25 шақырым жолға жөндеу жұмыстары жүргізілмек. Бұл туралы жолаушылар көлігі және автомобиль жолдары бөлімінің басшысы Серіққали Жұманов мәлімдеді.
— Биылғы жылы жол жөндеу жұмыстарына қазынадан 1 млрд. 181 млн теңге бөлінсе, ағымдағы жол жөндеу жұмыстарына 200 млн., орташа жол жөндеу жұмыстарына 916 млн. теңге қарастырылған еді. Нәтижесінде ұзақтығы 23 шақырымды құрайтын сегіз орталық көше (М.Дулатов, М.Жұмабаев, Ж. Шайжүнісов, Қайым Мұхамедханов, Абай, Шмидт) орташа жөндеуден өтті. Жолаушылар тасымалын қамтитын тағы 25 шақырым жол мен кәріз жүйелерінің дренажды желілеріне келесі жылы жөндеу жұмыстары жүргізіледі. Ал биылғы жылы осы дренажды желілерді қалпына келтіруге 170 млн. теңге бөлінді,- деді С.Жұманов.
— Қоғамдық көлікке қатысты туындаған мәселелерді бір арнаға түсіру үшін биылғы жылы маршрут желілерін оңтайландыру процесін жүргіздік. Барлық қоғамдық көліктердің тасымал жүйесі, тиімділігі, қозғалыс кестесі, жолаушылар саны тексеріліп, келесі жылдың тамыз айында жаңа тасымалдаушы мердігер компанияны таңдауға байланысты өткізілетін конкурсқа дайындық жұмыстары пысықталды. Нәтижесінде «Семавтопарк» ЖШС көліктерінің қозғалыс жиілігі өткен жылмен салыстырғанда 54%-дан 77%-ға, «Азия Комби» ЖШС 64-тен 80%-ға, «Таксомоторный парк» ЖШС 77-ден 83%-ға, «Автомигди» ЖШС 43-тен 83%-ға, «Семдортехника» 85-тен 91%-ға, «Семей көлігі» 69-дан 76%-ға артқаны анықталды, — дейді «Семей қаласының жолаушылар тасымалын басқару орталығы» ЖШС директоры Бейсенғазы Тастекеев. — Біздің орталық қоғамдық көліктердің қозғалыс жиілігін бақылап қана қоймай, санитарлық талаптардың сақталуын да назарда ұстап келеді. Осы жылдың қазан айында ғана 320 көліктің тазалық нормаларын сақтамағаны белгілі болды. Тасымалдаушыларға тексеріс жұмыстарының нәтижесін жазып, жиі хат жолдаймыз. Алайда тасымалдаушылар тарапынан кері байланыс бола бермейді,- деді ол.
Жиын соңында Ермак Сәлімов тасымалдаушыларға ескерту жасай отырып, оларды атқарушы билікпен бірге халық игілігі үшін жемісті қызмет етуге шақырды.
Жадыра Төлегенқызы, «Семей таңы»
