3 қараша күні Семейге Польша мемлекетінің Қазақстандағы Төтенше және Өкілетті елшісі Селим Хазбиевич келіп, поляк елінің Семей кәсіпкерлерімен әріптестік қарым-қатынас орнатуға ниетті екенін жеткізді. Кездесуге қала кәсіпкерлерімен бірге, қала әкімінің орынбасары Надежда Шарова, қалалық кәсіпкерлік бөлімінің басшысы Марат Нүгеров қатысты.
Келесі жылы Польша мемлекеті ел тәуелсіздігінің ғасырлық мерейтойын атап өтеді. Осыған орай поляк елі ауқымды іс-шаралар ұйымдастыруды жоспарлап отыр. Оның бірі Семей қаласымен байланысты. Атап айтсақ, Польша билігі Семей қаласында дүниеге келген поляк қайраткерлеріне ескерткіш тақтатас орнатпақ ниетте.
— Келесі жылы Польша мемлекетінің азаттық алғанына 100 жыл толады. Осы мерейтой қарсаңында ел азаттығы жолында тер төккен қайраткерлердің табаны тиген өңірлерді аралап жүрміз. ХХ ғасырдың басында Семейде де Алашорда үкіметі құрылып, ел бостандығы үшін қызмет етті. Сіздер де биыл Алашорда үкіметінің жүз жылдығын ел көлемінде атап өттіңіздер. Дегенмен сол кездегі саяси жағдайларға байланысты Қазақстанға тәуелсіздікті тағы біраз уақыт күтуге тура келді,- дейді елші.
Сондай-ақ С.Хазбиевич поляк кәсіпкерлерінің Қазақстан-мен, соның ішінде семейлік кәсіпкерлермен Польша экономикасының маңызды тетігі саналатын ауыл шаруашылығы техникасы саласында сауда және әріптестік қарым-қатынас орнатуға мүдделі екенін жеткізді.
— Елші болғандықтан Қазақстанның әр қаласын аралау — менің қызметім. Қазақстанға елші ретінде келерден бұрын әріптестік төңірегінде көп сұрақтар туындады. Тәуелсіздік алған жылдардан бері қазақ бизнесмендері Польшадан өз серіктестерін тапты. Сондықтан семейлік кәсіпкерлерді де Польша мемлекетімен, поляк кәсіпкерлерімен бірігіп жұмыс істеуге шақырамын. Бұл қарым-қатынас екі ел арасын жақындатып, екі жақ үшін де тиімді болатынына сенімдімін. Бүгінде Польшадағы көптеген кәсіпкерлер Қазақстан туралы, әріптестік туралы сұрайды. Бізде ауыл шаруашылығы техникасы өте жақсы дамыған, мамандарды тек ауыл шаруашылығы саласына дайындайтын 2-3 жоғары оқу орны бар. Бұл салада бәсекеге қабілеттілігіміз жоғары. Есесіне біздегі бағалар Германия, Франция мемлекеттерімен салыстырғанда арзан-дау. Сондықтан алдағы уақытта ауыл шаруашылығы техникасы саласында Қазақстан мен Польша арасында әріптестік қарым-қатынас жандана түсетініне сенемін,- деді ол.
Польша мемлекетінің Қазақстандағы Төтенше және Өкілетті елшісі қызметіне келместен бұрын саясаттанушы қызметін атқарған С.Хазбиевич тарихтың мемлекетаралық мәдени байланыстардың дәнекері екенін айтады.
— Мен Қазақстанға тамыз айының ортасында келдім. Саясаттанушы ретінде қазір Қазақстанда қазақ халқының бірігуі жолында үлкен жұмыстар атқарылып жатқанын байқадым. Мен, жалпы, саясатты тарих саясаты және әр мемлекеттің ішкі саясаты деп екіге бөлер едім. Тарих саясаты да елдің ішкі саясатының бір бөлшегі. Әсіресе бұл мемлекеттердің жақындасуы жолында үлкен рөл атқарады. Қазақстан Азия мен Еуропа мемлекеттерінің ортасында жатыр. Ал Польша Еуроодақпен байланыста. Кейде Еуроодақпен көзқарастарымыз да келісе бермейді. Еуроодақ — нағыз демократиялық ұйым,- дейді С.Хазбиевич.
Қалалық кәсіпкерлік бөлімнің басшысы Марат Нүгеров Қазақстанның қазіргі күні Польшамен жеміс-жидек тасымалы, тұрмыстық техника және тоқыма өнеркәсібі саласында сауда байланысын орнатқанын тиек етіп, поляк тауарларының сапасына көңілі толатынын жеткізді.
— Польша мемлекетінен әкелінетін жеміс-жидектердің сапасына көңіліміз толады. Ал тұрмыстық химияның сапасы әлемдік брендтермен тең деп айтуға болады. Бұл салада Қазақстанның Польшамен әріптестік қарым-қатынас орнатқанына 15 жылдың жүзі болды. Тоқыма өнеркәсібі мен жеңіл өнеркәсіп саласындағы сауда байланысын әлі де кеңейтеміз деген үміттемін. Қазақ елі Польшамен шекаралас болмаса да екі елді тарих байланыстырады. Бірінші дүниежүзілік соғыстың алдында және соғыстан ке-йін Балтық жағалауынан, Поволжьеден көптеген поляк қайраткерлері Қазақстанға жер аударылды. Қазақ елі поляк азаматтарын шетке қақпай, өз бауырындай көрді. Нәтижесінде жүз мыңдаған поляк азаматтары соғыс аяқталып, шекара ашылғанда аман-есен өз жұртымен қауышты. Поляк елі мен қазақ елі арасындағы байланыстың нығаюына біз де өз тарапымыздан мүдделіміз,- деді М.Нүгеров.
Қала кәсіпкерлері кездесу барысында сауда байланысына қатысты сауалдарын қойып, елшіден тұшымды жауаптар алды.
Жадыра ТӨЛЕГЕНҚЫЗЫ, «Семей таңы».
