8 қараша күні шаһар басшысы Ермак Сәлімов, сондай-ақ ШҚО жолаушылар көлігі және автомобиль жолдары басқармасының басшысы Мұрат Мұсатаев семейлік жолаушылар тасымалдаушылармен қала әкімдігінде кездесті. Күн тәртібіне автобус парктерінің алдағы тендерлерге дайындығы және қоғамдық көліктерді жаңарту мәселелері қойылды.
Бүгінде Семейдегі қоғамдық көліктердің басым көпшілігінің тозығы жеткен, қызмет сапасы да көңіл көншітпейді. Айтыла-айтыла жауыр болған осы және қоғамдық көліктерге қатысты өзге де мәселелер бүгінгі күнге дейін бір емес, бірнеше мәрте көтерілді. Сәрсенбі күні өткен жиында жоғарыда аталған мәселелер бүге-шігесіне дейін сөз болды. Кездесуде Семей қаласы жолаушылар көлігі және автомобиль жолдары бөлімі басшысының орынбасары Нұрлан Серғазинов:
— Техникаларды жаңарту – бүгінгі күннің ғана мәселесі емес, ол күн тәртібінен түспейтін мәселе. Бұл бағытта нақты мағлұматтар беруге жолаушыларды тасымалдаушылардың барлығы дерлік ниет білдіре бермейді,- деді.
Жиында белгілі болғандай, автобус парктерінің басшылары бүгінде тек шағын автобустарды жаңартуға атсалысуда. Ал үлкен автобустар он жылда бір рет жаңартылады. Тасымалдаушылар көлік техникаларының бағасы қымбат екенін әрі үлкен автобустарды үш жылда бір жаңартуды қалталары көтере бермейтінін айтып налыды.
— Бұрнағы жылдары қоғамдық көлік жүргізушілерінің тапқан табысын бақылауға мүмкіндік болмады. Алайда тексеру жұмыстарынан кейін, болжалды мәліметтер бойынша, автопарктердің қазіргі табысымен тек шағын автобустарды ғана емес, үлкен класты автобустарды да жаңартуға болатынына көз жеткіздік,- деді қала басшысы Ермак Сәлімов.
Айта кетейік, 2015 жылдың 26 наурызында қабылданған келісімшарт бойынша, көлік техникаларын жоспарлы түрде жаңарту соңғы екі жыл ішінде жүргізілуі тиіс еді. Бірақ жолаушыларды тасымалдаушылардың атынан сөз сөйлеген «Семавтопарк» серіктестігінің директоры техниканы жаңартуға дайын екенін, бірақ бұл бағыттағы жұмыс көлік жүйесін оңтайландырудан кейін, 2018 жылы басталатынын жеткізді.
– Себебі қай бағыттағы, нақты қандай техниканы жаңарту керек екені сол кезде белгілі болады,- деді Сергей Должиков.
— Неге біз 2018 жылды күтуіміз қажет? Қараша халық бүгіннен бас-тап заманауи әрі ыңғайлы автобустармен қатынағысы келеді және бұған олардың толық құқығы бар. Жолаушыларды тасымалдаушылар келесі жылғы тендерлерге қатысуы үшін жаңартылған техникаларымен келуі керек. Себебі тасымалдаушыларды таңдау жолында біз қатаң талаптар қоятын боламыз,- деп ескертті Ермак Сәлімов.
Кездесуге арнайы келген ШҚО жолаушылар көлігі және автомобиль жолдары басқармасының басшысы Мұрат Мұсатаев:
— Әр тасымалдаушы бүгінгі күннің талаптарына сай қызмет көрсетуге тиіс. Ең бастысы, қоғамдық көліктер белгілі кестеге сәйкес уақытымен жүруі керек, екіншіден, көліктері таза болып, ескі техника жаңартылуы қажет. Бұл — Көлік министрінің ұйғарымымен қабылданған шешім. Оны міндетті түрде іске асыруға тиіспіз,- деді өз сөзінде.
Жібек СЕРҒАЗЫ, «Семей таңы».
