Семейде пәтер тонау фактілері толастамай тұр. Ағымдағы жылы құқық қорғау органдары қала бойынша 1300 пәтер тонау фактілерін тіркеген. Осыған орай өңірде ҚР Бас прокурорының «Ұрлыққа тосқауыл» бағдарламасы шеңберінде «Қауіпсіз аула» жобасы жүзеге асырыла бастады. Жоба аясында «Қазақтелеком» АҚ компаниясы тұрғын үйлер подъездерінің іші мен сыртына бейнебақылау камераларын орнатуды қолға алған. Ұрлық көрсеткішін азайту мақсатында қала прокуроры, жергілікті полиция қызметі мен тұрғын үй-коммуналдық шаруашылығы бөлімі өкілдері, жеке пәтер иелері кооперативтерінің басшылары қала әкімдігінде бас қосты.
Семей ІІБ жергілікті полиция қызметі басшысының орынбасары Әділбек Нұғыманов өз баяндамасында бүгінде қаладағы көп пәтерлі 9 подъезге және он шақты аулаға бейнебақылау камералары орнатылғанын тілге тиек етті. Айтуынша, Семейде, пәтер тонаудан бөлек, аулада тұрған автокөліктердің дөңгелегін, аккумуляторын ұрлау жиілеп кетті. Осы ретте «Қазақтелеком» АҚ Семей филиалының даму цехының директоры Мұратқазы Мәліков аула қауіпсіздігін қамтамасыз ету үшін жиынға қатысушылар назарына арнайы жоба ұсынды.
— Қазіргі күні шаһардағы 224 көп қабатты үй «Қазақтелеком» компаниясының қызметіне жүгінеді. Тұрғындарға осы үйлердің подъездеріне бейнебақылау құрылғыларын тегін орнатуды ұсынамыз. Камераның біреуі подъездің кіреберісіне, екіншісі үйдің бірінші қабатына орнатылады. Әрбір тұрғын компаниямен жеке келісімшартқа отырып, ғаламтор арқылы жеке кабинетіне кіріп, өз подъезін, үй ауласын бақылауға мүмкіндік алады. Видеокамераларға техникалық қызмет көрсету ақысы үшін тұрғындар ай сайын 350 теңге төлеуі қажет. Құрылғыда жазылған мәліметтер сервер жүйесінде жеті күнге дейін сақталады. Ал құқық қорғау органдары қажетті ақпараттарды соңғы отыз күн ішінде көре алады,- дейді «Қазақтелеком» АҚ Семей филиалының даму цехының директоры Мұратқазы Мәліков.
Жуырда 94 көп қабатты үй тұрғындары бейнебақылау камераларын орнату жөнінде «Қазақтелеком» компаниясымен келісімшарт жасасып, 124 подъезде камера орнату мақсатында монтаж жұмыстары басталып кетті. Десек те азаматтардың жеке өміріне қатысты заңды бұзбау үшін ПИК төрағалары мен қызмет көрсету ұйымдарының басшылары міндетті түрде тұрғындармен кездесіп, жалпы жиналыс өткізуі немесе жазбаша сауалнама жүргізуі тиіс. Тұрғындардың басым көпшілігі қарсылық танытпаған жағдайда ғана аталған құрылғыны орнату жолдары қарастырылады.
Жібек Серғазы, «Семей таңы»
