Осы күндері Парламент Мәжілісінің депутаты, «Нұр Отан» партиясы парламенттік фракциясы жетекшісінің орынбасары, Экономикалық реформа және өңірлік даму комитетінің төрағасы Нұртай Сабильянов Шығыс Қазақстан облысында сайлаушылармен кездесулер өткізуде. Депутат Аягөз ауданының Аягөз қаласында, Ақтоғай кентінде және Қопа, Тарлаулы ауылдарында, Үржар ауданының Үржар, Мақаншы, Бақты, Қызылту, Елтай және Сегізбай ауылдарында кездесулер өткізді.
Кездесулерде халық қалаулысы сайлаушыларға Мемлекет басшысы Н.Ә.Назарбаевтың бес әлеуметтік бастамасының қазақстандықтарға үлкен маңызы бар екенін түсіндірді, оларды жүзеге асырудың міндеттері туралы және Қазақстан Республикасы Парламентінің заң шығару қызметі туралы айтып берді.
Сайлаушылар өз кезегінде ауыз сумен, тұрғын үймен қамтамасыз ету, автожолдарды жөндеу, халықты жұмыспен қамту, әлеуметтік қамсыздандыру, ауыл шаруашылығын дамыту, шағын несиелеу, білім саласын жақсарту, дәрі — дәрмектермен уақтылы қамтамасыз ету, интернет байланысын дамыту, шекаралық елді мекендердің инфрақұрылымын дамыту және басқа да мәселелерді көтерді.
Сонымен қатар Нұртай Сабильянов 1 сәуір күні Аягөз қаласында азаматтарды қабылдады. Күні бойы депутат 120 адамды қабылдады, оның көпшілігі су тасқынынан зардап шеккен тұрғындар болды. Барлық азаматтарға депутат тарапынан жауаптар мен түсініктемелер берілді.
Халық қалаулысының тұрғындармен кездесулері Шығыс Қазақстан облысының Абай, Жарма аудандарында жалғасады.
ҚР Парламенті Мәжілісінің баспасөз қызметі.
