Қазақстан Республикасы Парламенті Сенатының депутаты Дүйсенғазы Мусин жұмыс сапарымен Шығыс Қазақстан облысында болды. Сенатордың бұл жолғы сапары Президенттің 5 әлеуметтік бастамасының мән – мағынасын халық арасында, жастарға жан – жақты насихаттау, түсіндіру болғанымен, Семейге келгенде тасқын судан зардап шеккен тұрғындармен де жүздесті.
Алдымен Д.Қалматаев атындағы медициналық және М.Әуезов атындағы педагогикалық колледждерде жастармен жүздескен сенатор Мемлекет басшысының бес әлеуметтік бастамасының қазіргі Қазақстанның дамуы, халықтың әл-ауқатының жақсаруы үшін маңызды екеніне баса тоқталды.
— Елбасы жариялаған 5 әлеуметтік бастама қоғамда үлкен қолдауға ие болып, қызу талқылауға түсуде. Себебі мұнда халықтың көкейінде жүрген мәселелер қозғалды деп есептейміз. Бастаманың бесеуі де халықтың тұрмыс — тіршілігін жақсартуға, деңгейін көтеруге бағытталған. Бұл мәселелер депутаттық сауал ретінде де Парламент палаталарында көтеріліп келген. Барлығыңызға мәлім, осы жолғы құжатта жастарға берілетін мүмкіндіктерді арттыру жолдары қарастырылған. Жасыратыны жоқ, түлектердің оқу грантын жеңіп алу мүмкіндігі аз болып келген еді. Сондықтан бұл жастарымыздың болашағына үлкен үміт артатын Елбасының салиқалы саясаты деп айта аламын,- деді Дүйсенғазы Мағауяұлы.
Халық қалаулысы сондай-ақ сол күні Мирный кентінің тұрғындарымен жүздесіп, олардың өтініш-тілектеріне де құлақ асты. Семейде орын алған тосын жағдайға қатысты өз пікірін былайша білдірді:
— Семейде орын алған тосын жайт табиғат апаты емес. Естіген боларсыздар, Шүлбі су электр станциясынан келетін судың тәуліктік мөлшері секундына 1800 текше метрге дейін ұлғайған. Жағдайға кінәлі – Семей қаласы әкімдігіне, облыс басшылығына ескертпей су жіберген «Ертіс» бассейндік инспекциясы мен Шүлбі су электр станциясы. Бастысы, адам шығыны жоқ, дер кезінде жедел шешім қабылданып, мұз жару жұмыстары жүргізілді. Мұз жару жұмыстары 2 – 3 сағатқа кешіктірілгенде, жағдай бұдан да жаман болар еді. Қала әкімі уақытында дұрыс шешім қабылдай білді. Сонымен қоса жергілікті әкімдік биылдан қалмай Ертіс өзені жағалауын бекіту жұмыстары басталатынын мәлімдеді. Екіншіден, қалада, жалпы, облыста төтенше жағдайлар кезінде әрекет ететін техникалардың жетіспейтіні рас. Мұны аймақ басшысы Даниал Ахметов те айтқан еді. Ескертулер жасалды, тиісті органдар бұл жағдайды назарға алады деп ойлаймын,- деді Дүйсенғазы Мусин.
Жадыра ТӨЛЕГЕНҚЫЗЫ, «Семей таңы»
