«Ақылдастар» ауыл ардагерлері қоғамдық бірлестігінің 10 жылдығына арналған «Рухани жаңғыру: Жас ұрпақ елдің ұлттық — рухани тамырынан нәр алса, адаспайды» атты қалалық форум Достық үйінде болып өтті. Форум басталмас бұрын, қатысушылар қоғамдық бірлестіктің он жыл бойы атқарған жұмыстарына арналған көрмені тамашалады. Аталған қалалық форумға Семей қаласының әкімі Ермак Сәлімов және қазыналы қариялар, зиялы қауым өкілдері, мектеп ұстаздары мен оқушылар қатысты.
Семей қаласының әкімі Ермак Сәлімов форумға жиналғандарды құттықтап, мұндай игі шаралардың жас ұрпаққа берері мол екенін атап өтті.
— Ардақты ақсақалдар, қадірлі жерлестер, үлкенге құрмет, кішіге ізет көрсету — қанымызға сіңген асыл қасиет. Қариясын қазынаға балап, тектілікті сақтай білген Семей жерінде бүгін орны бөлек форум өтуде. Біз алдыңғы толқын ағаларға құрмет көрсету үшін жиналып отырмыз. Төрден орын алып, батасын берген, ақылын айтып, жол көрсеткен аға буынға алғысымыз шексіз. «Ақылдастар» қоғамдық бірлестігі тіл мен тарихты насихаттап, батыр бабаларға тағзым етіп, рухани жаңғыруға үлес қосып келеді. Жастарымыз осы жолды бағалап, аманатты сақтауға міндетті. Бізге дәстүрді жалғап, аталы сөзге тоқтап, баталы іске жұмылу керек. Бұл баршамызға ортақ. Ардақты ағайын, батамен көгерген ұлы Абай, мұхит ойлы Мұхтар, дана Шәкәрім туған жерде әрқашан бірлік болсын! Ел аман, жұрт тыныш, болашақ жарқын болсын,- деді өз құттықтауында қала әкімі Ермак Бидахметұлы.
Құттықтаудан кейін Семей қаласы әкімінің алғыс хаттары бірлестіктің Ахметкәрім Ахмадиев, Нұржамал Имашқызы, Әбдеш Имаханов бастаған 12 белсенді мүшесіне табыс етілді. Торқалы тоқсаннан асқан Әбдеш Имаханов ақ батасын беріп, қала басшысының ісіне табыс тіледі.
Өзіне сөз кезегі тиген бірлестік төрағасы Сағындық Бейсенбаев ұжымның қаламыздың рухани — мәдени, қоғамдық — саяси өміріне қосқан үлесін кеңінен баяндап беріп, сөз аяғында ақсақалдардың жас ұрпақ тәрбиесіндегі орны мен рөліне жан – жақты тоқталды.
Бұдан кейін жастар тәрбиесіндегі тарихи тағылым мен ұрпақтар сабақтастығына арналған 4 баяндама оқылды. Тарихшы ғалым Мұхтарбек Кәрімов «Алаш қозғалысы кезіндегі Шығыс Қазақстанның саяси өмірі» тақырыбында жиналғандарға соны деректер ұсынып, таным көкжиектерін кеңейтті. Танымал этнограф, белгілі шежіреші қария Молдабек Жанболатов «Әдет-ғұрып, салт-дәстүр – тәрбие бастауы» атты баяндамасында қазақ қоғамындағы бала тәрбиесіне қатысты өзекті мәселелерді қозғап, тыңдаған жанға ой салар орамды пікір айтты.
Қалалық «Қазақ тілі» қоғамының төрағасы, Р.Байсейітов атындағы қаржы – экономикалық колледжінің директоры Думанғазы Арғынғазиннің жасаған баяндамасында мемлекеттік тілдің қоғамдағы орны сөз болды. Ал Семей қалалық ІІБ кәмелетке толмағандар істері жөніндегі инспекторы Майра Қуандықова «Құқық қорғау бағытындағы жастар тәрбиесіндегі басты назар аударатын мәселелер» тақырыбында баяндама жасады.
Форум Семей қаласы өнерпаздарының концертімен аяқталды.
Серік ӘБІЛҚАСЫМҰЛЫ, «Семей таңы»
