Семей қаласының әкімдігі мен семейлік жеке кәсіпкер арасында жерге қатысты дау туындап отыр. Осыдан төрт жыл бұрын Анар Байкенова есімді кәсіпкер аукционда Әуезов даңғылы бойындағы 300 шаршы метр жер телімін сатып алған. Мұнда ол офис салуды жоспарлаған. Қолында нысанды салуға арналған рұқсат құжаттары болғандықтан, кәсіпкер бірден құрылыс жұмыстарын бастап кеткен. Алайда қала әкімі Ермак Сәлімов өткен жылдың күзінде осы жерге келгенде құрылыстың заңсыздығына көз жеткізген. Содан бері жер дауына қатысты іс сотта қаралуда.
Әуезов даңғылы мен Жеңіс көшесінің қиылысында орналасқан жер телімі рекреациялық аумақтар қатарына жатады әрі жалпыға ортақ жер учаскесі ретінде тіркелген. Сондықтан мұнда, заң бойынша, құрылыс нысанын жүргізуге болмайды. Кәсіпкердің офис салуына осы маңайдағы қала тұрғындары түбегейлі қарсы. Олардың айтуынша, мұндағы жасыл желек жойылып, балалар алаңқайы алынып тасталған.
— Менің мұнда тұрғаныма 38 жыл болды. Ағаштарды да өз қолыммен отырғызып едім. Дәл осы аумақта балалар асыр салып ойнап, біз серуенге шығатынбыз. Енді қазір біз отырғызған көшеттердің бірі де жоқ, аяусыз кесіп тастады. Құрылысшылардың ағаштарды кескенін ұялы телефоныма түсіріп алдым. Бәріміз бір кісідей жылап тұрдық,- дейді кәсіпкерге назын білдірген Ирина Безродная.
Мемлекеттік-құқық бөлімінің басшысы Ерлан Әубәкіровтің сөзінше, ҚР Жер кодексіне сәйкес, жер учаскелері жалпыға ортақ жерлер тізімінен алынып тасталған кезде ғана жекенің қолына өтеді. Ал аталмыш жер телімі әлі де қоғамға ортақ аумақ болып отыр. Бұдан бөлек, аукционға қойылған уақытта даулы жердің мекенжайы Затаевич көшесі, 35 «А» деп көрсетілген. Бірақ жер телімі Әуезов даңғылы мен Жеңіс көшесінің қиылысында орналасқан. Сондай-ақ жер учаскесін сату, сатып алу туралы мәселе Қоғамдық кеңесте де, қала құрылысы кеңесінде де қаралмаған көрінеді.
— Осы сынды даулы жерлер қалада көп. Қоғамдық аумақтардың жекеменшікке қалай өтіп кеткенін нақты ешкім білмейді. Бұл — жылдар бойы қордаланған мәселе. Ондай жерлерді анықтап, мемлекеттің қарамағына қайтарамыз. Ал аталмыш жер учаскесіне келер болсақ, жер телімі аукционға заңсыз қойылған. Себебі бұл жер рекреациялық аумаққа жатады және ешқандай құрылыс нысандарын салуға рұқсат берілмейді. Даудың соңғы нүктесі сотта қойылады,- деді Ермак Бидахметұлы.
Соттың шешімі жергілікті биліктің, көше тұрғындарының пайдасына шешілсе, аталмыш аумаққа қайтадан көшеттер отырғызылып, «Менің аулам» жобасы бойынша абаттандыру жұмыстары жүзеге асырылатын болады.
Әкімнің айтуына қарағанда, Семейде жасыл желекке зақым келтіріп, көлік тұрақтарын заңсыз кеңейту сияқты іс-әрекеттер көп. Бүгінде кәсіпкерлердің заңға қайшы әрекеттеріне байланысты мониторинг жүргізілуде.
Жібек СЕРҒАЗЫ, «Семей таңы»
