Соңғы қоңырау сыңғырлады. Тағы бір оқу жылы аяқталып, жас түлектер үлкен өмірге қанат қақты… 25 мамыр күні еліміздегі мектептердің барлығында Cоңғы қоңырау салтанаты өтті.
Семей қаласының әкімі Ермак Сәлімов шаһардағы 80 жылдық тарихы бар №18 жалпы орта білім беретін мектепте түлектерді құттықтап, сәт сапар тіледі.
— Құрметті ұстаздар, ата — аналар, мектеп бітіруші түлектер және оқушылар! Оқу жылының аяқталуымен барлықтарыңызды құттықтаймын,- деген Ермак Бидахметұлы мектеп бітірушілерге жылы лебізін білдірді. — Түлектер мектеп партасымен қоштасып, үлкен өмірге қанат қағайын деп отыр. Қымбатты түлектер, алдағы өмірде Сіздердің кім болатындарыңыз маңызды емес, бәлкім, ұстаз, инженер, қаржыгер, ақын боларсыздар. Ең бастысы — 11 жыл бойы ұстаздарыңыз бойларыңызға сіңірген адалдық, әділдік, тәрбиелілік, еңбекқорлық сынды адами қасиеттер. Аталған игі қасиеттер өмірден өз орындарыңызды тауып, «кірпіш болып қалануларыңызға» жол ашады деп ойлаймын.
Мектептегі салтанатты жиынға арнайы қатысқанын жеткізген қала әкімі білім ошағының 80 жылдық мерейтойына еліміздің түкпір-түкпірінен, тіпті алыс-жақын шетелдерден де мектеп түлектерінің келуі мектеп пен ата-ана, түлектер арасындағы қарым — қатынастың жоғары деңгейде екенін көрсететінін атап өтіп, оны мектеп әкімшілігі мен педагогтердің еңбегімен тікелей байланыстырды.
— Қазір елімізде жас ұрпаққа тәлімді тәрбие, сапалы білім беретін мектептердің материалдық – техникалық базасы нығайған. Бұл үрдіс Семей қаласында да жалғасын тауып келе жатыр,- деген қала әкімі бұл ретте ұстаздар қауымына да артылар жүктің зор екенін атап өтті.
Салтанатты жиында түлектермен бірге сынып жетекшілерінің де толқып тұрғанын байқауға болады. 11 «Б» сыныбының жетекшісі Ирина Цветкова:
— Бүгін ерекше күн, соңғы қоңырау. Түлектер үшін толқулы сәт. Шәкірттеріме сәттілік тілеймін,- десе, 11 «А» сыныбының жетекшісі Жанар Нысанғалиқызы:
— Оқушыларымыз армандаған армандарына, мақсаттарына жетсін. Қалаған мамандықтарының иесі болсын, оларды тек биіктерден көрейік,- деген тілегін білдірді.
Енді 11 жыл бойы біліммен, тәрбиемен қаруланған түлектер де ұстаздар мен ата-аналарының үмітін ақтау үшін барын салмақ.
— Бүгін, міне, біз алтын ұя мектебімізден түлеп ұшқалы тұрмыз. Барлық түлектер Ұлттық бірыңғай тестілеуден сүрінбей өтіп, қалаған мамандықтарына оқуға түссін деген тілегім бар. Ата-аналарымыздың, ұстаздарымыздың үмітін ақтайық. 11 жыл бойы біліммен, тәрбиемен сусындатқан мектеп ұжымына, еркелігімізді көтеріп, дұрыс бағыт-бағдар берген ұстаздар қауымына айтар алғысымыз шексіз,- деді жас түлек Темірлан Бейсенбин.
Айта кетейік, қаламызда жалпы 43 464 оқушы оқу жылын аяқтады. 11 сыныпты 1 920 шәкірт бітірген. Олардың 67-сі «Алтын белгіге», 56-сы үздік аттестатқа үміткер. Ал өткен жылы қала мектептерінен түлеп ұшқан 1 701 түлектің 54-і «Алтын белгіге», 72-сі үздік аттестатқа ұсынылған. Түлектердің 72 пайызы, яғни 1 231 оқушы ҰБТ-ға қатысып, орташа балл 82,2 көрсеткішін көрсеткен. Республика бойынша орташа балдың 80,2 болғанын ескерсек, біздің шәкірттердің көрсеткіші қуанарлықтай. Ал биыл түлектердің 75,7 пайызы ҰБТ-ға қатысуға ниет білдіріпті. Олардың сыннан сүрінбей өтулеріне тілектестігін білдірген қалалық білім бөлімі басшысының орынбасары Гүлнар Оразбекова жыл санап білім саласындағы көрсеткіш көтеріліп келе жатқанын айтады.
Биылғы Соңғы қоңырау салтанаты Семей қаласындағы физика-математика бағытындағы Назарбаев Зияткерлік мектебі үшін тарихи оқиға деуге болады. Себебі биыл білім ошағы қабырғасынан 12 сыныпты аяқтаған алғашқы түлектер үлкен өмірге қанаттанбақ.
Аталмыш мектепте 7-12 сынып аралығында білім алатын 693 оқушы оқу жылын ойдағыдай аяқтаса, 137 бала партамен қоштасқан. Олардың 5-уі — «Алтын белгіге», 29-ы — үздік аттестатқа үміткер. Қазіргі күні 14 түлек шетелдік және отандық маңдайалды оқу орындарының гранттарын ұтып алған.
Соңғы қоңырау салтанатына Семей қаласы әкімінің орынбасары Надежда Шарова, «Нұр Отан» партиясының Семей қалалық филиалы төрағасының бірінші орынбасары Зульфия Жамалтдинова арнайы қатысып, мектеп ұжымы мен түлектерге арнаған ыстық ықыласқа толы тілектерін жеткізді.
Барлық мектептердегі салтанатты жиында 2017-2018 оқу жылында білім мен өнерде, спорт пен шығармашылықта үздік нәтижеге қол жеткізген оқушылар, ұстаздар марапатталып, мектеп оқушылары концерттік бағдарлама ұсынды.
Әйгерім СӘРСЕНҚАЛИ, «Семей таңы»
