Жексенбі, 10 маусым күні Семей қаласының әкімі Ермак Сәлімов шаһардың Шығыс кентінің тұрғындарымен кездесті. Кездесуге қала әкімінің қос орынбасары Николай Ушаков пен Надежда Шарова, қала әкімі аппаратының басшысы Сержан Әзбергенов, облыстық мәслихат депутаты Альбина Ахметова, қалалық мәслихат депутаты Айнұр Арғынбекова, әкімдіктегі дербес бөлім басшылары да қатысты. Кездесу барысында аталған кенттің әлеуметтік-тұрмыстық жағдайы қарастырылып, тұрғындарды алаңдатқан мәселелер талқыланды.
Тұрғындардың өтініші бойынша аталған кенттің ішкі көшелері алдағы аптада тегістеліп, жөнделетін болды. Ол үшін қала басшысы тиісті бөлімдерге нақты тапсырма беріп, негізгі көшені жарықтандыруды қарастырып жатқанын да айтып өтті.
Көп қабатты үйлердің жоғары қабатында орналасқан пәтерлерге қысымның аздығынан кей кездері су жетпейтініне және кәріз құбырларында судың тез толып қалатынына байланысты «Семей су арнасы» кәсіпорнына мәселені шешуді тапсырды.
Кенттегі емхана қысқарады деген сөз негізсіз екенін айтқан Ермак Бидахметұлы дәрігерлік көмек тұрғындар үшін толыққанды жүзеге асатынын жеткізді.
Кездесу барысында қоғамдық көлік, балаларға ойын алаңын салу, тағы басқа мәселелер қарастырылып, қала әкімі тарапынан тиісті бөлім басшыларына нақты тапсырмалар берілді, орындау мерзімдері анықталды.
Айта кетейік, Ермак Сәлімовтің шаһардың шет аймақтағы тұрғындарымен кездесуі тұрақты ұйымдастырылып келеді. Естеріңізде болса, өткен аптада қала әкімі Ұшақтар кентінің тұрғындарымен жүздескен еді.
Семей қаласы әкімінің баспасөз қызметі.
