Оқушылық өмірмен қоштасу – өмірдегі жарқын әрі толқынысты сәттердің бірі. Бұл күні болашаққа арманмен және сеніммен қадам басқан әр түлек қуаныш пен қобалжу сезімдерін бойдан өткеретіні анық. Осындай қимас кештердің бірі жұма, 15 маусым күні Семейдегі Орталық алаңда өтті.
Биыл Семей қаласында 1926 түлек мектеп бітіріп, оның 67-сі «Алтын белгі», 57-сі үздік аттестат иегері атаныпты. Түлектерді осы маңызды күнмен құттықтауға шаһар басшысы Ермак Сәлімов арнайы келді.
— Мектеп бітіріп, балалық шақты артта қалдырып, жаңа белестерге қадам басқалы отырған түлектер үшін бүгін ерекше күн. Алдарыңызда жауапты міндет тұр. Ол – мамандық таңдап, өз болашақтарыңызды айқындау. Мемлекет басшысы: «Білім – ұлы күш. Адамзатты терең ойға кемел білім жетелейді»,- деп атап өткендей, ХХІ ғасыр – білім мен ғылымның ғасыры. Еліміздің болашағы – білімді жастар. Биыл қаламызда 1926 түлек мектеп бітіріп, үлкен өмірге жолдама алды. 67 оқушы «Алтын белгіге» ие болды. 57 оқушы үздік аттестат алды. Бұл — тынымсыз еңбектің жемісі, оқушының жеңісі. Сіздердің қалаған мамандықтарыңыздың иелері болуларыңызға тілектеспін. Қуаныш ұзағынан болсын. Білім алып, топтан озып, табысты болыңдар. Үлкен өмірге басқан қадамдарың сәтті болсын. Баршаңызға ақ жол тілеймін!- деген шаһар басшысы Ермак Сәлімов «Алтын белгі» иегерлеріне салтанатты түрде аттестат табыстады. Өз кезегінде түлектер де «Болашақтың қаласы» атты кітаптарын шаһар басшысына тарту етті.
— Біз, Семей қаласының 2018 жылғы түлектері, туған қаламыздың болашағы жайлы аса зор мақтанышпен, үлкен сүйіспеншілікпен айтамыз. Қазақстанның болашағы — дені сау, білімді ұрпақ. Олай болса, адамзат баласының денсаулығы үшін біз пайдасы көп, зияны жоқ дәрі-дәрмектерді тұтынуға тиіспіз. Фармацевт мамандығын таңдай отырып, еліміздің дамуына үлесімді қосамын деген ойдамын. «Болашақтың қаласы» жобасында біз Семейді тәуелсіз Қазақстанның ең дамыған, үздік қалалары қатарынан көреміз,- дейді жас түлек Айдана Саматова.
22 жыл бұрын Семей қаласындағы №12 орта мектепті тамамдаған түлек, қазір танымал кәсіпкер, туған мектебі жанынан стадионның салынуына себепкер болған, Қазақстан спидкубинг қоғамдық бірлестігінің негізін салған және жуырда ғана аталған спорт түрінен Семейде өткен халықаралық турнирді ұйымдастырған Арман Машимов та кеш қонақтары қатарынан табылды.
— Осыдан жиырма екі жыл бұрын, тіпті бір жыл бұрын да түлектер алдында сахнада сөз сөйлеймін деп ойламаған едім. Мен кино немесе эстрада жұлдызы емес, өз елін, туған қаласын жүрегімен сүйетін қарапайым ғана семейлікпін. Бүгін, Сіздердің естеріңізде мәңгі қалатын күнде, көпшілік алдында тілек айтып тұрмын. Себебі мен де Сіздер сияқты туған қаламды жақсы көрдім және жақсы көре беремін. Біздің айтқан сөзіміз емес, ісіміз ғана ел есінде қалады. Сондықтан, құрметті түлектер, болашақ ұрпаққа істеріңізбен үлгі болуға тырысыңыздар,- деді А.Машимов.
Сондай-ақ Семейдегі №35 мектептің түлегі, танымал радиожүргізуші, әнші Нариман Сұлтанбеков те сол күні түлектерге құттықтауын жаудырып, олардың болашақта үлкен белестерден көрінулеріне тілектестігін білдіріп, қуаныш иелеріне арналған авторлық әнін шырқады.
Түлектердің қоштасу вальсінен соң Орталық алаңдағы думан би кешіне ұласып, от шашумен тамамдалды.
Жадыра ТӨЛЕГЕНҚЫЗЫ, «Семей таңы»
