12 қыркүйек, сәрсенбі күні Семей қаласының баспасөз орталығында Новобаженово ауылдық округінің әкімі Кенжетай Өміртаев және Приречный ауылдық округінің әкімі Алғатай Байдомалақов БАҚ өкілдерімен жүздесіп, ауылдарында атқарылып жатқан жұмыстармен жан – жақты таныстырды.
Баспасөз мәслихатында алдымен Приречный ауылдық округінің әкімі Алғатай Байдомалақов сөз алып, округтегі жұмыстар жайында жан-жақты баяндады. Ауыл әкімі ауылдық округтің әлеуметтік — экономикалық жағдайына тоқталып, кәсіпкерлік, білім, денсаулық, спорт, мәдениет салаларындағы жетістіктерін паш етті, өзекті мәселелерін де ашық айтып, қолға алған жұмыстары жайлы ақпарат берді. Сонымен қатар алдағы уақытта жүзеге асатын істердің ішінде балалар алаңын жасауды жоспарлап отырғандарын жеткізді.
— Биылғы жылы атқарылған барлық жұмыстарға 34 млн. 480 мың теңге қаражат жұмсалды. Сонымен қатар «Өңірлерді дамыту — 2020» бағдарламасы шеңберінде Приречный ауылында демалыс алаңдары жасалды. Округке қарасты елді мекендердің көшелерін жарықтандыруға 578 000 мың теңге бөлінді. Мұздыбай ауылындағы «Мұздыбай-1» шаруа қожалығы екі пәтерлік 10 тұрғын үйдің құрылысын аяқтады. Бұл құрылыс шығыны 172 млн. теңгеден асыпты. Сондай–ақ келесі жылға округке қарасты Жарқын және Гранитное ауылдарына футбол алаңдарын, Мұздыбай және Жарқын ауылына балалар ойын алаңын орнатуға қаражат бөлу жоспарланып отыр,- дейді ауыл әкімі Алғатай Жігерұлы.
Ал Новобаженово ауылдық округінің әкімі Кенжетай Өміртаев бір жылда атқарылған жұмыстарға егжей-тегжейлі тоқталды. Әкімнің айтуынша, ауыл тұрғындарының әл-ауқаты жылдан-жылға жақсарып келе жатыр. Жұмыссыздар саны азайып, әлеуметтік нысандар жаңарған. Алда тағы да атқарылатын жұмыстар көп дейді ауыл әкімі.
— «Жұмыспен қамтудың жол картасы — 2020» бағдарламасы аясында мал шаруашылығын дамыту мақсатында шағын несиелер алу үшін қомақты қаражат бөлінді. Сондай-ақ таза ауыз сумен қамтамасыз ету бойынша Бұлақ ауылында орталық су жүйесі іске қосылды. Новобаженово ауылында құны 442 млн. теңгені құрайтын орталық сумен жабдықтауды қайта жаңғырту жұмыстары басталды. Жұмыстың 90 пайызы іске асты. Нысанды өткізу қазан айының аяғына жоспарланған. Су жүйесі іске қосылса, 568 үй сумен қамтамасыз етілетін болады,- деді Кенжетай Әбрешұлы.
Әкімдердің атқарған жұмыстары баяндалған соң, БАҚ өкілдері көкейде жүрген сауалдарына жауап алды.
Қуандық НӘДІРБЕКҰЛЫ, Семей қаласы
