Қала күні қарсаңында Абай атындағы кітапханада Ұлттық Отбасы күніне арналған «Біз бірге бақыттымыз» фестивалі болып өтті. Шараны «Отбасы орталығы» қоғамдық қоры Абай атындағы кітапханамен бірлесіп, қалалық әкімдіктің қолдауымен ұйымдастырды. Сайысқа қала әкімі Ермак Сәлімов қатысып, құттықтау сөз сөйледі.
— Баршаңызды Отбасы күнімен құттықтаймын! Отбасы – қасиетті құндылық. Адам баласына берілетін тәрбиенің ең негізгі тіні жанұяда қалыптасады. Сондықтан баланың жеке тұлға ретінде және еліміздің азаматы болып қалыптасуында отбасының атқарар міндеті зор. Баршаңызға денсаулық, бақыт, табыс тілеймін!– деді қала әкімі Ермак Бидахметұлы.
Қазіргі қоғамда жанұя құндылықтарын сақтау аса қажет екені баршаға аян. Аталмыш мереке отбасы құндылықтарының өзектілігін кейінгі ұрпаққа түсіндіруді басты мақсат етті. Сайыста арнайы әлеуметтік қызметтер көрсету орталығынан қызмет алушы отбасылар мен ұжым мүшелерінен төрт жанұя қатысты.
Жарыстың шарты бойынша, қатысушылар өз отбасын бейнеролик арқылы таныстырып, жанұядағы түрлі жағдаяттарға байланысты театрлық қойылым көрсетті. Сонымен қатар фотобайқау ұйымдастырылды.
Шара қорытындысы бойынша жарыс жеңімпаздары анықталды. Бірінші орынға арнайы әлеуметтік қызметтер көрсету орталығының өкілі Бектеновтер отбасы ие болды. Барлық қатысушыларға сертификаттар мен тұрмыстық техникалар табысталды.
Құралай ҚАЙЫРЖАНҚЫЗЫ, Семей қаласы.
