Сейсенбі, 25 қыркүйек күні Семей қаласының Шәкәрім атындағы мемлекеттік университетінде Қазақстан Республикасының Тұңғыш Президенті — Елбасының қоры Қазақстан жастарының конгресімен бірлесіп «Jas Qalam» форумын өткізді. «Таңшолпан» бағдарламасының жүргізушісі Ирина Тен, «365info» медиапорталының контент-директоры Николай Халабузарь өз тәжірибелерімен бөлісіп, семинар-тренингтер жүргізді.
Заман талабына сай жедел әрі сапалы ақпарат тарату, қоғамдағы болып жатқан мәселелерге талдау жасау журналистің біліктілігін талап етеді. Бұл үшін жастарға көбірек тәжірибе алмасу маңызды. Осыған орай Қазақстан Республикасының Тұңғыш Президенті — Елбасының қоры Қазақстан жастарының конгресімен бірлесіп «Jas Qalam» жастар журналистикасын дамыту жобасын жүзеге асыруды қолға алған. Форум бұған дейін Тараз, Алматы қалаларыныда өткізілді. Онда тележүргізуші және журналист Артур Платонов, «Қазақстан» РТРК-ның бас төрағасы Ерлан Қарин, «informburo» бас редакторы Михаил Дорофеев, тележүргізушілер Серік Акишев, Дина Төлепберген, «Жас қазақ» газетінің бас редакторы Срайыл Смайыл және «Мәселе» бағдарламасының авторы, журналист Нартай Аралбайұлы шеберлік сыныптарын өткізді.
Қаламызда өткен форумға 200-ге жуық жас журналистер мен Шәкәрім атындағы мемлекеттік университеттің «Журналистика» мамандығының студенттері қатысты. Жоба 14-29 жас аралығындағы журналистерге арналады.
Жастар журналистикасын дамытуға арналған жиын барысында Ирина Тен мен Николай Халабузарь медиапорталдың заманауи ақпарат тарату үрдісімен таныстырып, телебағдарлама жүргізудің қыр-сырын үйретті.
— Бүгінгі ақпараттық заманда сапалы ақпарат алу өте маңызды. Сондықтан нағыз кәсіби мамандарды тәрбиелеу үшін, университет бағдарламасынан бөлек, тәжірибелі журналистердің бағыт-бағдары да қажет. Алаштың астанасы Семей қаласына алғаш рет табан тіреп отырмын. Бүгін шаһардың белсенді жастарымен кездестім. Тренинг барысында қатысушыларды телевизияның жұмысымен таныстырып, өзімнің іс-тәжірибемді ұсындым. Мен үшін қызықты кездесу болды. Студенттерге де қызықты әрі пайдалы ақпарат бердім деген үміттемін,- деді «Таңшолпан» бағдарламасының жүргізушісі Ирина Тен.
Тренингтен кейін студенттер алған әсерлерімен бөлісіп, тәжірибелі журналистерге алғыстарын білдірді.
— Бүгінгі күн біз үшін жаңа ақпаратқа толы күн болды. Журналистер іс-тәжірибелерімен жан-жақты бөлісіп, заманауи ақпарат ағынында нағыз майталман маман болуға қажетті қасиеттерді атап өтті. Тележүргізуші Ирина Тенге алғысым шексіз және оның кәсіби біліктілігі жоғары екеніне көзім жетті. Ирина Тен журналистің экранда өзін ұстау әдебі мен дикцияға арналған жаттығуларды көрсетті. Тәжірибелі мамандардың шеберлік сыныптары студенттер үшін өте қажет. Сондықтан осындай шаралар жиі өтіп тұрса жақсы болар еді,- деді «Журналистика» мамандығының студенті Ергелді Тлеуқұл.
Форум алдағы уақытта Астана қаласында өткізіледі.
Құралай ҚАЙЫРЖАНҚЫЗЫ, Семей қаласы.
