«Жидебай — Бөрілі» мемлекеттік қорық-музейінде, Абай Құнанбайұлының 175 жылдығына орай, Құнанбай Өскенбайұлына арналған «Көрегенді көсем, парасатты шешен, ел қамқоры — Құнанбай» көрмесі ашылды. Көрмеге Семей қаласының зиялы қауым өкілдері және Шәкәрім Құдайбердіұлының ұрпақтары қатысты.
Көрмеге Абай қорық-музейінде жинақталған тарихи материалдар, Құнанбайдың тақиясы мен күміс белдігі, таңбалы мөрі, Қарқаралыда салдырған мешітінің макеті, Қарқаралыдағы түсіп жүрген үйдің макеті және өзге де тұрмыстық заттар қойылды.
— Құнанбай өз тұстастарынан озық тұрды. Оның алашқа мәлім болған жарқын істері көп. Солардың бірі – үш жүздің басын қосып, Өскенбайға ас беруі. Бүкіл үш жүздің рубасыларын, бай-сұлтандарды бір жыл бұрын шақырып, Көкшетаудың Көкжайдақ деген жерінде әкесіне ас берген екен. Құнанбай тарихи тұлға, тірлігінде көреген көсем, шешен, ел қамқоры, ұлы әке болған. Ұлы әкеден ұлы Абай туды. Өскенбай, Құнанбай ұрпағы 150 жыл бойы, 1856 жылға дейін Тобықтыны биледі. Құнанбай 1874 жылы қажылыққа барған сапарында жүз адамдық қонақ үйін тұрғызғанын да жақсы білесіздер. Бірақ ғимарат сақталмаған. Бұл туралы Шәкәрім, Ахат естеліктерінде айтылады. Абайдың әкеден үлгі алғаны сөзсіз. Әкесіне арнап жазған өлеңдері бүгінгі көрмеге қойылып отыр,- деді музейдің жетекші ғылыми қызметкері Нұрсұлу Санақбекқызы.
Семей қаласы әкімінің орынбасары Айдар Садырбаев, Абай музейі директорының инновациялық даму және қоғаммен байланыс жөніндегі орынбасары Тұрсын Шаңбай, Шәкәрім университетінің «Тарих және саясаттану» кафедрасының меңгерушісі, т.ғ.к, доцент М.Ибраемова сөз сөйлеп, академик Ерлан Сыдықовтың «Құнанбай» кітабының тұсаукесері өтті.
— Жуырда жерлесіміз, академик Ерлан Сыдықовтың Мәскеу қаласындағы «Молодая гвардия» баспасынан «Өнегелі адамдар өмірі» сериясымен «Құнанбай» кітабы жарық көрген болатын. Нұр-Сұлтан қаласында автордың қатысуымен арнайы таныстырылымы өтті. Бүгінгі көрме аясында Семей қаласында да кітап таныстырылымын ұйымдастыруды жөн көрдік. Оқырман ретінде бұл кітап Құнанбай тұлғасының тек тәуелсіз Қазақстан елінде ғана емес, Еуразия кеңістігінде, қала берді әлемдік деңгейде танылуына бірінші қадам деп есептеймін. Құнанбай жайлы түрлі пікірлер айтылуы мүмкін. Дүние жүзіне алғаш рет Құнанбайды ірі тұлға ретінде «Абай жолы» романы арқылы Мұхтар Әуезов танытса, тарихи тұрғыда академик Ерлан Сыдықовтың еңбегі жарық көрді деп түсінемін, — деді Абай музейі директорының инновациялық даму және қоғаммен байланыс жөніндегі орынбасары Тұрсын Шаңбай.
Іс-шара барысында Абайдың әсем әндерінен композициялар орындалып, облыстық Ә.Қашаубаев атындағы филармонияның «Кербез» фольклорлық ансамблі «Шалқыма» күйімен кешке көрік берді.
Жадыра ТӨЛЕГЕНҚЫЗЫ, «Семей таңы» {jcomments off}