5 қазандағы мәліметтерге сүйенсек, Қазақстанда індет басталғалы бері 108 236 адам коронавирус жұқтырып, 103 277-і сауығып шыққан. Қайтыс болғандар саны – 1725. 3213 адам ем алуда. Соңғы тәулікте елімізде ауру жұқтырғандар саны 59 адамға артса, оның 14-і біздің облысымызда тіркеліп отыр.
«Қазіргі уақытта коронавирустық инфекциядан 3 213 адам ем қабылдауды жалғастыруда. Олардың арасында 73 жеткіншек бала бар. Стационарларда 1 806 науқас жатыр. 1 407 адам амбулаториялық жағдайда емделуде. Жалпы, науқастардың арасында 89 адамның ахуалы нашар. Соның ішінде 12 науқастың жағдайы өте ауыр деп бағалануда. 19 науқас өкпені жасанды желдету аппаратында жатыр»,- деп жазылған ҚР Денсаулық сақтау министрлігінің хабарламасында.
Аймақ басшысы Даниал Ахметовтің тапсырмасымен облысымызда індеттің ықтимал екінші толқынына дайындық әлдеқашан басталып кеткен. Күз бен қысқы маусымда короновирус инфекциясын жұқтырушылар саны ұлғаю қаупіне байланысты қосымша 6000 төсек-орын дайындалды. 5 ПТР-зертхана және 3 компьютерлік томография кабинеті ашылады. Індеттің ауыр түріне шалдыққан науқастар үшін иммундық плазманы дайындау жұмыстары жүргізілуде. Бүгінгі күнге дейін 1484 доза дайындалды, бұл жалпы республикалық көлемнің 47% -ын құрайды.
Ал Өскемен қаласында жуырда Пульмонологиялық орталық ашылмақ. Орталық 150 орынға арналған. Қайта құру жұмыстары жүргізіліп жатқан ғимараттың сәулеттік кейпі сақтала отырып, іші, қасбеті жаңартылды. Қазіргі уақытта жұмыс 80 пайызға орындалған.
«Бұл жерде 200-ден астам адам еңбек ететін болады. Мердігерлер қойылған міндетті жоғары жауапкершілікпен сапалы орындауда. Медициналық жабдықтар мен жиһаздардың басым бөлігі жеткізілді. Әрбір палата оттегі розеткаларымен жабдықталмақ. Орталықта, пульмонологтермен қатар, инфекционистер де жұмыс істейді. 35 орынға шақталған реанимация және интенсивті терапия бөлімі қарастырылған»,- деп жазды аймақ басшысы Инстаграм әлеуметтік желісіндегі парақшасында.
Оқу жылының бірінші айындағы мәлімет бойынша, облысымызда 29 оқушы COVID-19-ға шалдыққан. Олардың 13-і кезекші сыныптарда оқыса, 16-сы қашықтан білім алады. Осыған орай ауру шыққан мектептердегі кезекші сыныптарды қашықтан оқуға ауыстыру туралы қаулы шығарылды. Қазір облыстағы барлық мектептерде санитарлық-дезинфекциялық жұмыстар жүргізілуде.
Сонымен қатар 5 қазан күні ҚР Бас мемлекеттік санитарлық дәрігері «Қазақстан Республикасының мемлекеттік шекарасындағы өткізу пункттерінде коронавирустық инфекциямен аурудың алдын алу шараларын одан әрі күшейту туралы» қаулыға қол қойды. Қаулы бойынша Қазақстан азаматы болып табылмайтын адамдардың Қазақстанның мемлекеттік шекарасынан өту кезінде 72 сағат бұрын ПТР әдісімен COVID-19 сынағынан өткендігі туралы куәлігі болмаса, оларға елге кіруге тыйым салынады.
Дипломатиялық миссиялардың, консулдық мекемелердің және Қазақстан Республикасында тіркелген халықаралық ұйымдардың өкілдіктерінің қызметкерлері және олардың шетелден Қазақстанға келген отбасы мүшелері тұрғылықты жері бойынша COVID-19-ға зертханалық тексеруден өтеді.
Әкімдер, облыстық денсаулық сақтау басқармаларының басшылары, Алматы, Нұр-Сұлтан, Шымкент қалаларының әкімдері шетелден анықтамасыз келген Қазақстан азаматтарын карантиндік ауруханаға жеткізуді қамтамасыз етуі керек.
Айта кетейік, сонымен қатар елімізде COVID-19 белгісі бар пневмония дертіне 33 571 адам шалдығып, 27 507 адам сауығып шықты. 360 науқас көз жұмды.
Айтолқын САМАТОВА, «Семей таңы»{jcomments off}