Шығыс Қазақстан облысы бойынша бүгінгі күні «Қарапайым заттар экономикасы» бағдарламасы аясында жалпы саны 255 жоба мақұлданды.
Тоқтала кетсек, «Қарапайым заттар экономикасы» мемлекеттік бағдарламасы 2018 жылы қабылданған. Елбасы Нұрсұлтан Әбішұлы Назарбаевтың тапсырмасы бойынша қарапайым заттар экономикасының жобалық кеңсесі іске қосылып, өңдеу өнеркәсібі өкілдеріне жеңілдікпен несие беру және субсидия арқылы қолдау көрсету мүмкіндіктері енгізілген болатын. Бағдарламаның басты мақсаты — импортқа тәуелділікті азайтып, отандық кәсіпкерлерге күнделікті тұтынымдағы тауарлар өндірісін ұлғайтуға барынша қолайлы жағдай жасау. Бұл, әрине, өз кезегінде аймақтағы шағын және орта кәсіпкерлікті дамытуға, жаңадан жұмыс орындарын ашуға ықпал етеді. Өздеріңізге мәлім, бұл бағдарлама бәсекеге қабілетті, сапалы, ең бастысы, кең номенклатурасы бар қазақстандық өнімді өндіруге бағытталған. Осы мақсатты көздеген кәсіпкерлер ішкі нарықты халық тұтынатын отандық тауарлармен толықтыруға тиіс.
Аймағымызда аталған бағдарлама бойынша 46,1 млрд теңгеге 255 жоба мақұлданды. Бұл жобалар келешекте облыс халқының қажеттіліктерін өтеп, әлеуметтік маңызы бар азық-түлік тауарларының импортын алмастырмақ. Бұл жобалардың ішінде екінші деңгейлі банктер желісі бойынша 58, аграрлық несие корпорациясы арқылы 5,4 млрд теңге көлеміндегі 197 жоба бар.
«Жеңілдікпен несие берілетін «Қарапайым заттар экономикасы» жобаларының әрбірін егжей-тегжейлі пысықтау қажет. Баса назарды аграрлық секторға аудару керек. Сондықтан облыстың кәсіпкерлік және ауыл шаруашылығы басқармаларына соңғы бес жылдағы «Бизнестің жол картасы» бағдарламасы аясында кепілденген және субсидияланған жобалардың саны туралы толық есеп дайындауды тапсырамын», — деп жазды бұл орайда Даниал Ахметов өзінің фейсбук әлеуметтік желісіндегі жеке парақшасында.
Айта кетейік, бүгінде облыс көлемінде банктер мақұлдаған жаңашыл бастамалардың ішінде бидай және қарабидай ұнын, түрлі май дақылдарын, құс өнімдерін өндіруге бағытталған бірқатар ірі жобалар бар. Оның ішінде Семей қаласы бойынша қолға алынған шаралардың үлесі анағұрлым жоғары болып отыр. Кәсіпкерлік және ауыл шаруашылығы басқармаларына субсидиялау жұмыстарын күшейту, әсіресе аграрлық сектор жобаларына ерекше назар аудару тапсырылды.
Әлібек КЕМЕЛХАН, «Семей таңы»{jcomments off}
