Ұлыларды дүниеге әкелген Зере, Ұлжан аналарымыздың даналығы алты алашқа аян. Абай елінде қазақы қасиеттерді бойына жиып, асыл аналардың ізін жалғап келе жатқан ақ жаулықты жандар аз емес. Солардың бірі – ұлағатты ұстаз Аққайша Тұрсымбекова. Ардагер ананың өмірден түйгені де, кейінгі толқынға айтары да көп.
— Қасиетті өңір Аягөз қаласында 1958 жылы қарапайым отбасында дүниеге келдім. Әкем Ботағазы — соғыс ардагері. Көпбалалы отбасындағы үш қыздың үлкені болдым. Апам Шолпан нағыз қазақы тәрбиенің мәйегін қанып ішкен, ұлтымыздың салт-дәстүрін, тілін, дінін құрметтеген, көзі ашық, көкірегі ояу, тілге шешен текті адам еді. Сол кісінің қолында өстім. Бойымда қандай да бір жақсы қасиет болса, сол апамның берген тәрбиесі деп білемін, — дейді Аққайша Ботағазықызы.
Кейіпкеріміз мектепті үздік бітіріп, Семейдің Крупская атындағы педагогикалық институтына химия-биология факультетіне оқуға түсіпті. Оқуын тамамдаған соң Саржал ауылының азаматымен отбасын құрады. Еңбек жолын осы ауылдағы мектепте бастайды. Ата-енесі елге сыйлы жандар болған екен. Аққайша апа ол кісілердің де тәлім-тәрбиесін көріпті.
Отағасы Сейфолла екеуі бауырларын қамқорлықтарына алып, тәрбиелеп өсіреді, үйлендіріп, бір-бір отау қылып шығарыпты.
1983 жылы отағасының қызметі ауысып, аудан орталығы Қарауыл ауылына көшіп келеді. Абай атындағы орта мектепте табан аудармай 32 жыл еңбек етіп, зейнет демалысына шығыпты.
— Тәңір берген төрт перзентімізді өсіріп, жеткіздік. Бәрі отбасылы. Қазір немерелерімнің ортасында еңбегімнің зейнетін көріп отырмын, — дейді Аққайша әжей шүкіршілігін айтып.
-Абай атындағы мектеп-лицейде химия пәнін тереңдетіп оқытатын сыныптарға сабақ бердім. Шәкірттерім республика, облыс бойынша өткен жарыстарда, ғылыми жобаларда топ жарып, жүлделі орындарға ие болды. Өзім 2015 жылы зейнетке шыққаныммен мамандығымнан қол үзген жоқпын. Химия-биология пәні мұғалімдеріне арналған әдістемелік көмек құралдарын жаздым, оқушыларды ҰБТ-ға дайындауға арналған бірнеше кітапшаларым жарыққа шықты. «Оқу мен оқытуды бағалау химия пәні сабақтарында», «Жаңа форматтағы ҰБТ есептері»,«ҰБТ химия есептері шығару жолымен», «Химиядан аттестацияға көмекші құрал», «Фарадей заңдары химия есептерінде», «Жаңа оқулық есептері шешуімен» және өзге де көптеген оқулықтарым республика ұстаздары арасында сұранысқа ие болды, — дейді ардагер ұстаз.
Өмірін білім саласына арнаған білікті ұстаз Аққайша Ботағазықызының еңбегі бағаланып, ШҚО білім басқармасының алғыс хатымен, Құрмет грамотасымен, ҚР Білім және ғылым министрлігінің Құрмет грамоталарымен марапатталып, «Білім беру ісінің үздігі» атанды.
— Ұстаз боламын деген жастарға айтарым: әрбір оқушыға сенім арту керек. Сенім шәкіртке қанат бітіреді. Ұстаз тек білімімен ғана емес, биік адамгершілігімен де шәкіртке үлгі болуы керек. Әрбір бала табиғаттың таңғажайып құбылысы ғой, сондықтан әрқайсысына жеке тұлға деп қараған жөн, — дейді кейіпкеріміз.
Мереке қарсаңында елінің ілтипатына, шәкірттердің алғысына бөленіп жүрген ұлағатты ұстазды құттықтап, сарқылмайтын жігер, таусылмайтын қуаныш тілейміз!
Нұрқыз МЫРЗАҚАНОВА,
«Семей таңы»
