Semeytany.kz — Көкпекті ауылында тұрғындардың сұранысы ескеріліп, ауыл халқына қолжетімді, заманауи талаптарға сай «Толағай» белсенді өмір орталығы жұмысын бастады.
Бұған дейін ауылда бос уақытты тиімді өткізуге және спортпен жүйелі түрде шұғылдануға арналған арнайы жабдықталған орынның жоқтығы тұрғындар тарапынан бірнеше рет көтерілген еді. Осы мәселені шешу мақсатында жаңа спорттық нысан пайдалануға берілді.
Орталықта жүгіру жолақтары, гирлер, велотренажерлер, сондай-ақ әйелдерге арналған фитнес аймағы қарастырылған. Бір мезетте 40–45 адамға дейін қабылдауға мүмкіндігі бар. Нысан аптасына алты күн жұмыс істейді, ерлер мен әйелдер үшін сабақтар бөлек кесте бойынша ұйымдастырылған.
Жаңа орталықтың ашылуы ауыл тұрғындарының денсаулығын нығайтуға, белсенді өмір салтын қалыптастыруға, әсіресе жастардың спортпен тұрақты шұғылдануына қолайлы жағдай жасайды.
