Semeytany.kz — Абай облысының әкімі Берік Уәли бүгін азаматтарды қабылдау орталығында тұрғындарды жеке сұрақтары бойынша қабылдады. Қабылдауға облыстық басқарма басшылары мен Семей қаласы әкімдігінің өкілдері қатысты.
Кездесу барысында тұрғындар тұрғын үй кезегі мен баспана мәселелерін, медициналық көмектің қолжетімділігі мен сапасын, қала ішіндегі және ауылдық елді мекендердегі жолдарды жөндеу жайын, сондай-ақ кәсіпкерлікке берілетін гранттар мен бизнес бастамаларды қолдау тетіктерін көтерді.
Көп балалы ана Меруерт Аймұратова Қарақалпақстаннан алу қажет құжаттарды рәсімдеуге жәрдемдесу туралы өтініш білдірді. Аймақ басшысы оның жағдайын жеке қарап, тиісті органдарға құқықтық тұрғыда көмек көрсетуді тапсырды.
Берік Уәли қабылдауға жазылған азаматтардың барлық өтініш-тілектерін мұқият тыңдап, жауапты басқармалар мен Семей қаласы әкімдігінің өкілдеріне нақты тапсырмалар жүктеді. Облыс әкімі көтерілген мәселелер назардан тыс қалмайтынын, бақылауында болатынын атап өтті.
