Semeytany.kz – Абай облысының әкімі Берік Уәлидің төрағалығымен «Таза Қазақстан» экологиялық бағдарламасының өңірде іске асырылу барысы талқыланған мәжіліс өтті. Жиынға облыстық басқарма басшылары, өңірлік департаменттер мен республикалық ұйымдардың филиал жетекшілері, сондай-ақ аудан, қала әкімдері онлайн режимде қатысты.
Басқосуда табиғи ресурстар және табиғат пайдалануды реттеу басқармасының басшысы Марат Теміржанов, облыстық Полиция департаменті жергілікті полиция қызметі басқармасының бастығы Әсет Өтепов және «AMANAT» партиясының облыстық филиалының төрағасы Қанат Әділбай «Таза Қазақстан» бағдарламасы шеңберінде атқарылып жатқан жұмыстар туралы баяндама жасады.
Облыста экологиялық бастамаларды жүйелі түрде іске асыру мақсатында 44 іс-шарадан тұратын өңірлік жоспар бекітілген. Биыл санитарлық-экологиялық екі айлыққа 349 мыңнан астам тұрғын, 15 мыңнан аса ұйым және 6 мыңнан астам техника тартылды. Соның нәтижесінде 182 мың аула, 3 мыңнан астам парк пен сквер, 1315 ескерткіш аумағы тазартылып, 52 мың тонна қатты тұрмыстық қалдық шығарылған. Семей қаласында экологиялық бақылауды күшейту үшін 1937 құқық бұзушылықты тіркеу камерасы жұмыс істейді.
Көгалдандыру және абаттандыру бағытында да бірқатар жұмыстар жүзеге асуда. Биыл Семей қаласында алғаш рет 75 мың ағашты толық түгендеуді қамтитын дендрологиялық жоспар әзірленді. Жалпы өңір бойынша қалалар мен аудандарда 70 мыңнан астам көшет отырғызылған.
Полиция қызметкерлері «Таза Қазақстан» бағдарламасы аясында күн сайын аумақтарды абаттандыру ережелерінің сақталуын тексеру үшін рейдтер өткізіп келеді. Жыл басынан бері 9091 құқық бұзушылық фактісі анықталып, 74,6 млн теңгеге жуық айыппұл салынған. Сонымен қатар, рұқсат етілмеген қоқыс орындарын жою бойынша аудандық жергілікті атқарушы органдарға 171 хабарлама жолданды.
«Ғарыш Сапары» ұлттық компаниясының ғарыштық мониторингі нәтижесінде облыс аумағында 191 заңсыз қоқыс үйіндісі анықталған. Қазіргі уақытта оларды жою жұмыстары жүргізілуде. Мәжілісте қоқыс орындарына камералар мен ескерту тақтайшаларын орнату, аялдамаларға қоқыс жәшіктерін жеткілікті көлемде қою, заңсыз қоқыс төгілетін аумақтарды жою, ағаш отырғызу жұмыстарын әлсіз жүргізген аудандардағы жауапты тұлғалардың жұмысын күшейту жөнінде нақты тапсырмалар берілді.
Кеңес барысында барлық қала-аудан әкімдері аймақ басшысына «Таза Қазақстан» бағдарламасын жүзеге асыру кезінде анықталған кемшіліктерді жою бағытында қолға алынған шаралар туралы есеп берді.
Берік Уәли өз сөзінде бағдарлама аясында бірқатар іс-шаралар атқарылғанымен, олардың нәтижесі әлі де жеткіліксіз екенін атап өтті. Аймақ басшысы тұрғындар арасында түсіндіру жұмыстарын күшейтуді, көпқабатты үйлерге қызмет көрсететін компаниялар мен мердігер ұйымдардың жұмысын қатаң бақылауға алуды, құрылыс нысандарын қоршау кезіндегі кемшіліктерді жоюды тапсырды.
Облыс әкімі Мемлекет басшысы Қасым-Жомарт Тоқаевтың «Таза Қазақстан» экологиялық бастамасына ерекше тоқталып, тазалықты қамтамасыз ету науқандық емес, күнделікті өмір салтына айналуы керектігін айтты. Оның айтуынша, Президенттің тапсырмасына сәйкес облыста бұл бағытта 12 арнайы жиналыс өткізіліп, 102 хаттамалық тапсырма берілгенімен, олар толық көлемде орындалмаған.
– Қардың жаууы тазалық жұмыстарының тоқтауына себеп болмауы тиіс. «Таза Қазақстан» тек жазғы сенбілікпен шектелмейді. Аудан-қала әкімдері жұмысты дұрыс үйлестіріп, жүйелі түрде ұйымдастыруы қажет. Өңірде тазалық жұмыстары қысы-жазы бір сәтке де тоқтамауы тиіс. Қоғамдық орындар, әлеуметтік нысандардың аумағы, жаяу жүргіншілер жолдары мен көпқабатты үйлердің аулалары уақытылы қардан тазартылып, қоқыс жәшіктері тұрақты түрде босатылып тұруы керек, – деді Берік Уәли.
