ІТ – ТЕХНОЛОГИЯЛАРДЫ ДАМЫТУ – УАҚЫТ ТАЛАБЫ
Шығыс Қазақстан облысындағы 482 ауылда интернет жылдамдығы баяу. Аймақ басшысы Даниал Ахметовтің төрағалығымен өткен жиында облыстағы цифрландыру және IT — технологияларды дамыту мәселесі талқыланды. Бірінші кезекте елді мекендердің кең жолақты интернетпен қамтамасыз етілу жайы сөз етілді.
— Осы бағыт бойынша қолданыстағы республикалық Жол картасынан басқа, 2022 жылдың қаңтарында өзіміздің арнайы бағдарламамызды әзірледік. Бүгінгі таңда 683 ауыл интернетке қосылған. Алайда оның ішінде жылдамдығы секундына 8 мбиттен жоғары 201-і ғана. Қалған елді мекендерде ғаламтор жылдамдығы 5 мбиттен аспайды, – деді өз сөзінде облыс әкімі Даниал Кенжетайұлы.
Облыс басшысы қалалар мен аудандардың әкімдеріне әрбір елді мекеннің атауы және интернеттің шекті жылдамдығы көрсетілген карта жасауды тапсырды.
«250+» бағдарламасы аясында ұялы операторлар ауылдарды мобильді интернетпен қамтамасыз етуге дайын, бірақ 58 антенна-діңгек құрылысын орнату қажет. Аймақ басшысы жергілікті атқарушы органдарға 10 күн ішінде жобалық-сметалық құжаттама әзірлеуді тапсырды.
Бүгінгі таңда өңіріміз бойынша 103 елді мекенде интернет желісі мүлде тартылмаған. Ғаламторға қолжетімділік жоқ, демек әлеуметтік және экономикалық бағдарламаларға қолжетімділік те жоқ, бұл мәселені дәл қазір шешу қажет.
Аталмыш мәселені облыс әкімі тікелей назарында ұстайтын болады.
— Біріншіден, біз интернетті мүлдем жоқ жерде өткіземіз. Сондай-ақ биыл біз осы бағыттағы IT-мамандар үшін 15 грант бөлеміз, — деді бұл ретте аймақ басшысы.
«СТ» — ақпарат
