ҚР Премьер-министрінің орынбасары Ералы Лұқпанұлы Тоғжановтың төрағалығымен Мұхтар Әуезовтің 125 жылдық мерейтойын мерекелеуге дайындық жөніндегі жұмыс тобының отырысы өтті.
Жиынға бірқатар мемлекеттік орган өкілдері мен өңір әкімдері, Қазақстан Жазушылар одағы мен М. Әуезов атындағы әдебиет және өнер институтының басшылығы, танымал тарихшылар мен әдебиеттанушылар қатысты.
Қазақтың заңғар жазушысының мерейтойын атап өту жөніндегі жалпыреспубликалық жоспарға сәйкес, биыл 4 бағыт бойынша 82 іс-шара ұйымдастырылады. Оның ішінде М.Әуезовтің әдеби-мемориалдық үй-мұражайы ғимаратына ғылыми-реставрациялау жұмыстарын жүргізу, Шолпан-Атада жазушының бюстін орнату шаралары бар. Мектеп оқушыларына арналған «Әуезовтану» бейнедәрістер циклі әзірленіп, әдеби подкастар жасалады. Халықаралық театр фестивалі өткізіліп, «Ақан – Зайра» трагедиясы алғаш рет сахналанатын болады.
Сондай-ақ «Қилы заман» повесі бойынша телехикая түсіру қолға алынбақшы. Шетел архивтеріндегі М. Әуезовке қатысты құжаттар зерделеніп, тың материалдар іздестіру қарастырылған.
Сондай-ақ, жоспардан тыс, өңірлік деңгейде 500-ден аса мерекелік шара өткізу көзделіп отыр. Осы ретте Е. Тоғжанов жазушының мерейтойын атап өтуге барлық өңірлер лайықты деңгейде атсалысуы қажеттігін атап өтті.
Жиын барысында әдебиеттанушылар мен жазушылар тарапынан мерейтойды өткізуге қатысты бірқатар ұсыныстар айтылып, оларды іс-шаралар жоспарына енгізуді жұмыс тобын мақұлдады.
Вице-премьер қоғамдық маңызы бар мәдени-бұқаралық, ақпараттық-имидждік, ғылыми зерттеу, ағартушылық іс-шаралардың жоғары деңгейде орындалуы үшін бірқатар тапсырмалар берді. Атап айтқанда, Мәдениет және спорт министрлігіне Жоспар мен мерейтой логотипін барлық мемлекеттік органдарға уақтылы жолдауды және оның іске асырылуы туралы есептік ақпаратты тоқсан сайын Үкіметке енгізіп отыруды, сондай-ақ мүдделі мемлекеттік органдар мен ұйымдарға жоспардың сапалы орындалуын қамтамасыз етуді тапсырды.
Қ.ЖОЛЫМБЕТ
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
