Семей қаласында айтулы мереке қаланың орталық алаңында аталып өтілді. Бұл жерде Достық үйіндегі этно-мәдени орталықтардың қолөнер бұйымдарының көрмесі, кітаптар көрмесі қойылды, ойын алаңы және оқу залдары ұйымдастырылды. Сонымен қатар, жиналғандарға мерекелік концерттік бағдарлама қойылды.
Қала тұрғындарын Семей қаласының әкімі Бақытжан Байахметов құттықтады.
– Бірлігі берекелі, тірлігі мерекелі, ынтымағы жарасқан елдің ғана ырысы мен табысы мол, болашағы жарқын болмақ. Ортақ шаңырағымыздың астында тыныштық пен келісім мәңгіге салтанат құрсын! Бейбіт өмірдің берекесі артып, еліміз аман, елдігіміз баянды болсын!, – деп құттықтады жиналғандарды шаһар басшысы Бақытжан Байахметов.
Сонымен қатар, бүгін 1 мамыр – Қазақстан халқының бірлігі күніне арналған Киокушинкай каратэ мектебі оқушыларының XXV жалпықалалық жүгіру марафоны өтті. Оған барлығы 600 спортшы қатысты.
