СЕМЕЙДЕ ЖЕҢІС КҮНІ АТАП ӨТІЛДІ
9 мамыр күні қала тұрғындары, соғыс ардагерлері мен тыл ардагерлері Жеңіс саябағына жиналды. Алдымен Даңқ гирляндасы мен Мәңгілік алауға гүл шоқтарын қою рәсімі өтті. Қала жұртшылығы майданда қаза болғандарды бір минут үнсіздікпен еске алды.
Жиналғандар алдында Семей қаласының әкімі Бақытжан Байахметов құттықтау сөз сөйледі.
– Құрметті ардагерлер мен тыл еңбеккерлері! Сіздердің замандастарыңыз соғыстың барлық ауыртпалығын сезінді. Сұрапыл соғыстың даңққа толы ерліктері – біздің қоғамымыздың мақтанышы. Біздің көпұ лтты ортақ үйіміздегі бейбітшілік пен келісімге, өскелең ұрпақты тәрбиелеу ісіне баға жетпес үлес қосқандарыңыз бізді ерекше қуантады. Арамызда ұзақ өмір сүріп, Жаңа Қазақстанның, жерлестеріңіздің, достарыңыз бен туыстарыңыздың жетістіктеріне әрдайым ортақ болыңыздар!- деді Бақытжан Байахметов.
Қала басшысы сондай-ақ жастарға үндеу жолдады:
– Иә! Сіздер сұрапыл соғысты көрген жоқсыздар. Сіздер жаңа тәуелсіз елде ержеттіңіздер. Сіздерде жаңаша ойлау, көзқарас және азаматтық ұстаным бар. Біздің қоғам сіздерге үлкен үміт артады, өйткені біздің егемендігіміз бен тәуелсіздігімізді қорғау елдің одан арғы даму жолын дәл сіздер анықтайсыздар, бұл – сіздерге артылған үміт! Сіздер елімізді қандай салада болсын дамытсаңыздар да, өз борыштарыңызды биік ұстаңыздар! Өз азаматтық ұстанымдарыңыз бен ата-бабаларыңыздың естеліктерін лайықты деңгейде сақтаңыздар!- деді.
Құттықтау сөзден кейін ардагерлер, қала тұрғындары мен қонақтары үшін халықтық ансамбльдер, шығармашылық ұжымдардың қатысуымен мерекелік іс-шара өткізілді.
Кешке Жеңіс саябағында «Шырақ жағу» акциясы ұйымдастырылып, Орталық алаңда мерекелік отшашумен аяқталатын әскери-патриоттық концерт өткізіледі.
Анар АХМЕТҚАЛИЕВА,
«Семей таңы»
