ТРОТУАРЛАР ЖӨНДЕЛУДЕ
Семей қаласының әкімі Бақытжан Байахметов әкімдік мамандарымен бірге Ұшақтар, Юность шағын аудандары, Стаханов және Дулатов көшелерін аралап шықты. Қала басшысы Ұшақтар шағын ауданындағы көшелерді тегістеу жұмыстары мен Юность шағын ауданындағы және Стаханов көшелеріндегі жарықтандыру тіректерін орнату жұмыстарының барысымен танысты. Сондай-ақ Дулатов көшесіндегі тротуарды ағымдағы жөндеу жұмыстарын да тексерді. Жолдың негіз қабаттары — астыңғы және тегістеу — құм-қиыршықтас қоспасынан жасалса, материалдарды құю, жабын ыстық ұсақ түйіршікті асфальтбетон қоспаларынан жасалады.
Жарықтандыруды орнату жұмыстарын ерекше атап өту керек. Юность көшесі бойынша (отбасылық дәрігерлік амбулатория жолына) 13 тірек, 11 шам, Стаханов көшесіне 25 тірек, 22 шам, Островский көшесіне 17 тірек, 14 шам, Достоевский көшесіне 30 тірек, 28 шам, Боровая көшесі 23 тірек, 21 шам, Сосновая көшесіне 25 тірек, 23 шам орнатылуда. Аталған көшелерде жөндеу жұмыстары аяқталғаннан кейін Силин, Омская, Восточная көшелерін жарықтандыру жоспарлануда.
Ағымдағы жылы қаржыландыру жоспарында қаланың 38 көшесін грейдерлеу жұмыстарын жүргізуге 200 млн теңге көлемінде қаражат қарастырылған. Ағымдағы жылдың 4 мамырындағы жағдай бойынша, аталған жұмыстар Ұшақтар кентінде, Юность тұйық көшелерінде, жалпы, 6 көшеде орындалуда. Орындалған жұмыс көлемі 16 мың шаршы метрді құрайды. Барлық жұмыстар жоспарға сәйкес жүргізіледі.
Қаланың 9 көшесінің — Шәкәрім даңғылы, Дулатов, Момышұлы, Қабанбай батыр, Беспаев, Созидательная (44 мектеп), Байтұрсынов көшелері және Восход кентінің (Рудный тұйық көшесіндегі 34 мектеп) тротуарлары ағымдағы жөндеуден өткізілетін болады. Аталған жұмыстарды жүргізуге «2-А» ЖШС мердігерлік ұйымымен 69,7 млн теңгеге шарт жасалған. Жалпы ауданы 11 999 шарша метр, ұзындығы 6 шақырымды құрайды. Жұмыс шілде айына дейін аяқталады деп жоспарлануда.
Қала басшысы Бақытжан Байахметов жауапты бөлімдерге орындалатын жұмыстардың сапасын арттыруды тапсырамын.
Анар АХМЕТҚАЛИҚЫЗЫ,
«Семей таңы»
