Жақында жергілікті журналист-жазушы Дәулет Сейсенұлының «Өзге емес, өзім айтам өз жайымды» деген атпен әулет пен әлеумет туралы ғұмырнамалық роман-естелігі жарық көрді. Кітаптың аннотациясында атап айтылғандай, автор ең алдымен өз ұрпағына, ал одан кейінгі жерде ағайын-туыс, дос жаранға арналған кезекті жаңа кітабында өз өмірінің белестерімен бірге, әр кезеңдегі заман көрінісі мен қоғам тынысын ашып көрсетуді мақсат еткен. Соған орай, бейбіт заманда қырық жылғы қырғынды басынан кешірген қасиетті де қасіретті Саржал ауылының шерлі тарихы, нарыққа көшкен кезеңдегі, одан кейінгі жерде Алаш астанасы атанған Семей қаласының басынан өткен қиын кезең шынайы тұрғыда баяндалған.
Еліміз егемендікке қол жеткізген-нен бергі жерде Семей өңірінде дүркіреп өткен хакім Абай, дана Мұхтар, данышпан Шәкәрім мерейтойлары, кешегі атом полигонының Елбасының алғашқы Жарлықтарының бірімен жабылғаннан бергі кезеңдегі оңды өзгеріс-жаңалықтар да автор назарынан тыс қалмаған. Осындай айтулы оқиғалардың ортасынан табыла білген автор ақиқаттан алыс кетпеуді мақсат еткені бірден аңғарылады. Кітаптың тілі жеңіл, оқиғасы ширақ, еріксіз езу тарттыратын жарқын беттері де аз емес.
Қырық жылдан астам өмірін қазақ баспасөзіне арнаған, соған орай түрлі деңгейде, айталық облыстық, республикалық және еларалық басылымдарда зор абыроймен қызмет еткен Дәулет Сейсенұлының журналистік өмір жолы кейінгі жас тол-қынға ой салады деп білеміз. Бүгінде, Семей қаласының Шәкәрім атындағы мемлекеттік университетінің журналистика бөліміндегі студенттерге дәріс оқып жүрген Дәулет Сейсенұлының бұл еңбегін соларға арналған оқулық десе де болады.
Осы орайда бұл жаңа кітап Семейдегі «PRINTMASTER» полиграфия- лық орталығынан жарыққа шыққанын, кітап сапасы мен безендірілуі бүгінгі күн талабына сай екендігін де астын сыза отырып айта кеткен жөн. Яғни, жергілікті баспагерлердің бұл тұрғыдағы талпынысын қолдамасқа болмайды. Осының өзі Семейдің бүгінгі мүмкіндігін көрсетсе керек. Еліміздің рухани орталығы үшін мұның бәрі қажетті шаруа деп білеміз.
«СТ» ақпарат {jcomments on}
