ЖАҢА КӘСІПОРЫНДАР АШЫЛАДЫ
Семей қаласының әкімі Бақытжан Байахметов өңдеу өнеркәсібінің жаңа нысандарының құрылыс барысымен танысты.
Консерві өнімдерін шығаратын зауытқа 200 миллион теңге бөлінеді. Бүгінде жұмыстың 40 пайызы аяқталды. Қажетті жабдықтардың бір бөлігі сатылып алынып, жеткізілді. Аталған зауытта жылына 600 тонна консерві өнімдері шығарылады деп күтілуде. Жүзден астам жаңа жұмыс орны ашылады.
Осы кәсіпорынның жанында мал сою цехы салынады. Инвестиция сомасы 300 миллион теңгені құрайды. Цех тәулігіне 30 бас ірі қара мал мен 150 бас ұсақ мал союға қуатты болады. 15 жаңа жұмыс орны ашылады.
Тағы бір жоба – құрама жем өндіретін зауыт салу. Жобаға 400 миллион теңге инвестиция бөлінді. Меншік иесі өз қаражатынан 65%-ын төлеуге, 35% — ын қарыз қаражаты есебінен салуға дайын. Аталған зауыт жылына 10 мың тонна құрама жем өндіретін болады. 30 жаңа жұмыс орны құрылады. Зауыт құрылысы 2022-2023 жылдар аралығын қамтиды.
— Аталған кәсіпорынға қажетті шикізат біздің өңірден сатылып алынады. Зауыт өнімі Шығыс Қазақстан аумағында сатылатын болады. Сонымен қатар Оңтүстік Қазақстанға, еліміздің батыс өңірлеріне құрама жем жеткізу бойынша келіссөздер жүргізілуде. Аталған зауыт ауыл тұрғындарына қажет. Біз өз тарапымыздан жобаны жүзеге асыру үшін жан-жақты қолдау көрсетеміз, — деді Бақытжан Байахметов.
Жоба «Өндіріс» индустриялық аймағының аумағында бірнеше гектар жер учаскесін және қуаты сағатына 500 кВт болатын электр энергиясын алу үшін мемлекеттің қолдауын қажет етеді.
Семей қаласының әкімі кәсіпкерлік және ауыл шаруашылығы бөлімдеріне инвесторлармен тығыз жұмыс жүргізуді және барлық рұқсат беру құжаттарын тиісті рәсімдеу мәселелерін жеделдетуді тапсырды.
Инабат АБЛАХАТҚЫЗЫ,
«Семей таңы»
