18 мамыр күні Абай театрында «Салауат» ШҚО жастар қоғамдық бірлестігінің ұйымдас-тыруымен дәстүрлі «Семей аруы — 2014» бай-қауының қорытынды сайысы өтіп, сұлулығы мен сымбаты келіскен арулардың ішінен жеңімпаз анықталды.
Байқауда қаладағы жоғары оқу орындары мен колледждердің арулары бақтарын сынады. Сәуір айында басталған байқауға қатысушылар үш негізгі бөлім бойынша сайысқа түсті.
{jcomments on}Қаладағы мейрамханалардың бірінде өткен «Ас — адамның арқауы» атты алғашқы бөлімінде арулар қамыр илеп, оны жаю мен бауырсақ (үлкен, ұсақ) дайындау және дастархан безендіру кезеңдері бо-йынша өзара бақ сынады. Ал, «Ана көрген — тон пішер» деп аталатын екінші бөлім Семей қаласының Шәкәрім атындағы мемлекеттік университетінде өтті. Ондағы сайыстың шарттары мынадай болды: әр ару 50х50 см. матаға өз қиялынан туындаған ою-өрнектерін тігуі керек. Оюды тігуге 3 сағат уақыт берілді. Ал, тіккен оюларын арулар театрда өткен қорытынды кеш барысында әділқазылар алдында қорғады. Арулар са-йысының қызған шағы да театрда өткен осы үшінші, яғни, қорытынды бөлімде болды. Қорытынды бөлімде қаракөздеріміз «Мен қазақ қызымын» (таныстыру), «Ана көрген — тон пішер» сайысы бойынша ою-өрнектерді қорғау, «Өнерлі өрге жүзер», «Білгенге маржан», «Қыздарға әсемдік жарасады» кезеңдері бойынша сынға түсті. Нәтижесінде, Семей қаласының Шәкәрім атындағы мемлекеттік университетінің студенттері Гүлім Оралғазықызы «Сымбатты ару», Жадыра Қалижарова «Өнерлі ару», ал, Семей қаржы-экономика колледжінің студенті Айнұр Асанова «Парасатты ару» атанса, Семей мемлекеттік медицина университетінің студенті Жанерке Архалық «Шебер ару» аталымы бойынша марапатталды. Ал, Қазақ инновациялық гуманитарлық-заң университетінің студенті Ажар Жұмабекова жеңіске жетіп, «Семей аруы 2014» атанды. Сонымен қатар, әлеуметтік желілердегі дауыс беру қорытындысы бойынша, сайыстан тыс «Көрермендер көзайымы» аталымын Айнұр Асанова (Семей қаржы-экономика колледжі) жеңіп алды. Сайыс жеңімпазы мен жүлдегерлері бағалы сыйлықтармен марапатталды.
Өз тілшіміз.
