Өткен жұма күні қалалық әкімдікте кәмелеттік жасқа толмағандардың құқықтарын қорғау жөніндегі комиссияның кезекті отырысы өтті. Жиынға ІІБ басшысының орынбасары Марат Зекенов, білім бөлімінің қорғаншылық және қамқоршылық секторының әдіскері Роза Омарова, сондай –ақ, қалалық мәлихат депутаттары қатысты. Отырыста ата-аналық борышын атқарғысы келмейтін азаматтар мен заңға қайшы әрекет жасаған жасөспірімдердің мәселелері қаралды. Жиында қалалық ІІБ бастығының орынбасары Мақсат Зекенов бастаған комиссия мүшелері күн тәртібіне қойылған сұрақтар бойынша Затон, Әуезов және Орталық полиция бөлімшелерінің кәмелеттік жасқа толмағандардың ісі жөніндегі инспекторларының баяндамаларын тыңдады. Солардың ішінде ащы суға құмартқанның салдарынан балаларының тәрбиесіне немқұрайлы қараған азаматтардың мәселесіне ерекше назар аударылды. Мысал келтіріп айтар болсақ, Евгения Свиридова атты қала тұрғыны ішімдікке салынып, жайсыз отбасы ретінде арнайы тіркеуге алынған. Бұдан бөлек наркологиялық диспансердің есебіне тұрғанына бірнеше жылдың жүзі болған. Тіпті, кәмелетке толмағандардың құқықтарын қорғау жөніндегі комиссияның алдыңғы отырысында Евгения Свиридова қатаң ескерту алған. Алайда түзелудің орнына ескі әдетіне басып, 12 жасар Дмитрий есімді ұлының тәрбиесі мен оқуына көңіл бөлмей келген. Полиция инспекторының баяндамасын тыңдап, мәселені жан-жақты талқылай келе, комиссия мүшелері ішімдікке салынған ананы ата-аналық құқығынан айыру жөнінде мамандандырыл-ған ауданаралық сотқа өтініш беру туралы шешім шығарды. Алайда, Евгения маскүнемдігін қойып, түзелуге шын ниеттенсе, сот үкімі шыққан соң үш айдан кейін ата-аналық құқығын қалпына келтіруге мүмкіндік алатынын айтты.
{jcomments on}Сондай-ақ, отырыс барысында тонау, ұрлық жасау сияқты қылмыс жасаған жасөспірімдердің істері де қаралды. Соның бірі өткен жылдың қазан айында Е. есімді баланың ұялы телефонын ашық түрде күш көрсетіп тартып алған А. есімді кәмелеттік жасқа толмаған спорт колледждің студентінің ісі. Заңға қайшы әрекеті қылмыстық іс ретінде кәмелеттік жасқа толмағандардың істері жөніндегі мамандандырылған ауданаралық сотта қарастырылып, тараптардың татуласуы нәтижесінде қылмыстық жауапкершіліктен босатылған. Комиссия мүшелері қоқан лоқы көрсеткен балаға келешекте мұндай бұзақылық тағы да қайталанар болса, қатаң жазаға тартылуы мүмкін екенін айтып, қатаң ескерту жасады. Сондай-ақ, Мақсат Зекенов соңғы жылдары спорттық колледж студенттері тарапынан заңбұзушылықтар жиілеп кеткенін, комиссияның әр отырысында кем дегенде осы оқу орнының екі-үш оқушысының ісі қаралатынын сөз етіп, бұл өз кезегінде білім ошағындағы тәрбие жұмыстарының лайықты деңгейде жүргізілмейтінін білдіреді дегенді айтып, алаңдаушылық білдірді. Сондықтан ол, басқа оқу орындарының ішінде осы білім ошағының студенттері арасында жүргізілетін тәрбие жұмыстарын ерекше қадағалау керек екендігін атап өтті.
Жалпы жиын барысында қаралған 30 істің 18-і жайсыз отбасыларға қатысты болса, 12-і әртүрлі деңгейдегі тәртіп бұзушылық пен қылмыстық әрекеттер жасаған жасөспірімдер мәселесі. Комиссияның шешіміне сәйкес ащы суға шектен тыс құмартып, бала тәрбиесіне немқұрайлы қараған 2 азамат ата-аналық құқықтарынан айырылды. Қалған ата-аналарға қатаң түрде ескерту жасалып, түзелулеріне мүмкіндік берілді.
Мирас ҚҰСАЙЫН, «Семей таңы»
