Новобаженов ауылдық округінде өсімдік және мал шаруашылығы салалары жақсы дамыған. 13 шаруашылық субъектілері ауыл шаруашылық дақылдарын өсірумен айналысады. Егіс алқаптары 5320,5 гектар аумақты алып жатыр, 1055 гектар алқапқа дәнді дақылдар, 1950 гектарға майлы дақылдар, 30 гектарға картоп, 128,5 гектар алқапқа көкөніс және бақша дақылдары, 2147 гектарға жем-шөп дақылдары егілуде.
Жуырда Семей қаласының әкімі Бақытжан Байахметов ауылдық округтегі көктемгі егіс жұмыстарының барысымен танысып қайтты.
Аталған округтегі ауыл шаруашылығы мақсатындағы жерлердің жалпы ауданы 63,4 мың гектарды құрайды. Оның 51,7 гектары — жайылымдық, 7,3 гектары — егістік, 0,6 гектары — шабындық және 3,8 гектары — тыңайған жерлер.
Округте Қазіргі таңда округтегі кейбір шаруашылық субъектілері 1230 гектар алаңда бөлінген суармалы жер учаскелерін пайдаланбай отыр. Ауыл шаруашылығы дақылдары егілген 5288 гектар жердің тек 415 гектары ғана суарылады, яғни суару әдістері қолданылады.
Қала әкімі пайдаланылмай жатқан жерлерді айналымға енгізу және суару жүйелерін қолдану қажеттігіне ерекше назар аударды. Ол үшін осы бос жер учаскелерін игеру және пайдалану бойынша инвесторларды тарту қажет. Қазіргі таңда инвесторлар тарапынан қызығушылықтар бар. Олар өсімдік шаруашылығы саласын дамытуға және суару жүйелерін қалпына келтіруге қаражат салуға дайын.
Биылғы жылы ірі «BA Agro Invest Group» агрокомпаниясы 2,0 млрд теңге қаражат бөліп, майлы, дәнді, жем-шөп дақылдарын өсіру және іске асыру бойынша инвестициялық жобаны жүзеге асыруды бастады. Новобаженов ауылдық округі аумағында 7022,9 гектар суармалы егістік бар. Ағымдағы жылы 2500 гектар ауыл шаруашылығы алқаптары игеріліп, 1500 гектар майлы (күнбағыс) және 1000 гектар дәнді дақылдар (бидай) егіледі. Жақын арада суармалы жерлердің ауданы 7000 гектарға дейін жеткізіледі және осы мақсаттар үшін қосымша 2,0 млрд теңге меншікті қаражат салынады.
Жергілікті атқарушы биліктің басты міндеті — суармалы жерлер мен жайылымдық жерлерге жер телімдерін әділ бөлу.
— Аумақты аралау барысында біз бір кездері жақсы суару жүйесі, арналар мен арықтар, сорғы станциялары болған үлкен жер телімдерін көрдік. Бүгінде мұның бәрі жарамсыз жағдайда. Бізге бұрынғы инженерлік инфрақұрылымды қалпына келтіріп, инвесторларды тарту үшін барлық жағдайды жасау керек. Ол үшін ауыл шаруашылығы жерлерін ұтымды пайдалануды жете түсіну қажет: мал жаюға, егістікке, шабындыққа қандай жерлер бөлінгендігін анықтап, мақсаты бойынша пайдаланылмайтын учаскелерге тексеру жүргізу қажет, — деді қала әкімі Бақытжан Байахметов.
Қала басшысы ауыл шаруашылығы тауарын өндірушілерімен кездесулер өткізіп, олардың ұсыныстарын тыңдады. Екі айдан кейін мұнда жобалау институттарының мамандарын шақыру жоспарлануда. Сондай–ақ ауыл шаруашылығы құрылымдарына «Бизнестің жол картасы — 2025» бағдарламасына қатысуға қолдау көрсетілетін болады. Бұл үшін кәсіпкерлердің өздері жобалық-сметалық құжатты және дамудың бизнес-жоспарларын уақтылы дайындауы тиіс.
Бақытжан Байахметов азық-түлік қауіпсіздігінің маңыздылығын ерекше атап өтті. Ауыл кәсіпкерлерін қолдау нәтижесінде сапалы табиғи өнім алуға және жергілікті нарықтарды өз көкөністерімізбен қолайлы бағамен толтыруға болады.
Новобаженов ауылдық округінде өткен әкімнің есептік кездесуінде тұрғындар жайылымдық жерлердің жетіспеушілігі мәселесін көтерді. Кездесу қорытындысы бойынша арнайы комиссия құрылып, тиісті жұмыстар жүргізілді. Жер телімдерін дұрыс бөлуге қатысты қажетті мәліметтер бар. Қала әкімі Бақытжан Байахметов округте жеткілікті әлеует бар екендігін мәлімдеді.
Көктемгі егіс жұмыстарына келетін болсақ, көптеген шаруа қожалықтары озық технологияларды қолданады. Өнімділікті арттыру үшін минералды тыңайтқыштар мен заманауи ауылшаруашылық техникалары және жаңа жабдықтар қолданылады. Сұраныс ескеріле отырып, егіс алқаптарының құрылымы да өзгеруде. Мысалы, «Лаура» шаруа қожалығы 30 гектар алқапта ТL жаңбырлатқыш агрегатын орнатып, картоп пен көкөніс дақылдары (бұрыш, қызанақ, қияр, қырыққабат, баялды) өсірілетін 43 гектар алқапта тамшылатып суару әдісін қолданады.
Қабылданған шаралардың барлығы әлеуметтік маңызы бар ауыл шаруашылығы тауарлары бағасын тұрақтандыруға, жергілікті ауыл шаруашылығы тауарын өндірушілердің өнімін ішкі нарыққа жеткізуге және күзгі-қысқы кезеңде қаланың қолда бар көкөніс қоймаларын азық-түлікпен толтыруға септігін тигізеді.
Анар АХМЕТҚАЛИЕВА,
«Семей таңы»
