Семей қаласының әкімі Бақытжан Байахметов Пархоменко көшесіне барып, асфальт төсеу жұмыстарын тексерді, -деп хабарлайды Семей таңы тілшісі.
Қаржаубайұлы көшесі бойымен күн сайын жүздеген автокөлік өтеді. Пархоменко көшесін асфальттап, ретке келтіру негізгі көлік қозғалысының жүктемесін азайтуға мүмкіндік береді. Жүргізушілерге параллель көшелермен жүру ыңғайлы, бірақ оның жағдайына байланысты олар аталған көшемен жүрмеуге тырысады.
Қаржаубайұлы көшесі қарттар үйінің аумағында тарылып кететіндіктен, бұл жерде үлкен кептелістер пайда болады.
Қаржаубайұлы көшесі бойындағы көлік қозғалысын жеңілдету үшін бірнеше іргелес көшелерге орташа жөндеу жүргізу жоспарланып отыр. Атап айтқанда Пархоменко көшесінде (Қаржаубайұлы көшесінен Қабылбаев көшесіне дейін, ұзындығы 1,9 шақырым, көшенің ені 9 метр) жөндеу жұмыстары жүргізіледі, аумағы 16835,54 шаршы метрді құрайды. Сол сияқты Жангелдин көшесіндегі (Қаржаубайұлы көшесінен Жаңатайұлы көшесіне дейін, ұзындығы 0,4 шақырым, көшенің ені 8 метр) жөндеу жұмыстары 3005,9 шаршы метр аумақты қамтиды.
Қабылбаев көшесіндегі (Пархоменко көшесінен Қаржаубайұлы көшесіне дейін, ұзындығы 0,2 шақырым. Көшенің ені 8 метр) жөндеу жұмыстары 1708,9 шаршы метр аумақта жүргізіледі.
Сондай-ақ Қаржаубайұлымен қиылысатын Бегалин көшесін асфальттау жоспарда бар. Жоспарланған жұмыстардың барлығы аяқталғаннан кейін осы бағытта автокөліктердің өтуі айтарлықтай жеңілдейді деп күтілуде.
Аталған учаскеден басқа, қазіргі таңда Ибраев, Мәңгілік Ел, Сәтбаев, Қабылбаев көшелерінде жол-құрылыс жұмыстары жүргізілуде.
Биыл сонымен қатар ұзындығы 60,2 шақырым болатын 62 көшеде орташа жөндеу жұмыстарын жүргізу жоспарлануда.
Анар АХМЕТҚАЛИЕВА,
«Семей таңы»
