Мемлекет басшысы үстіміздегі жылы 16 наурыздағы халыққа Жолдауында Ата Заңға енгізілетін толықтырулар мен өзгертулерді жалпыхалықтық референдумға шығару туралы ұсынысын айтып, жаңа саяси реформалар бағдарламасын ұсынған болатын. Бұл реформалар Конституцияға өзгерістер енгізу негізінде жасалмақшы.
Дәл қазір тарихи өзгерістер уақытында өмір сүріп жатырмыз. 5 маусым күнгі жалпыхалықтық референдумда қазақстандықтар ҚР Президенті Қасым–Жомарт Тоқаевтың «халық үніне құлақ асатын мемлекет» қағидасы аясында билік пен қоғам, халық пен мемлекет арақатынасының жаңа форматына негізделген Ата Заңдағы өзгертулер мен толықтыруларға дауыс береді. Енді елімізді демократияландыру процесі халықтың пікіріне негізделе отырып жүзеге асатын болады. Суперпрезиденттік басқарудан ықпалды Парламенті бар президенттік басқаруға өту Бірінші республикадан Екінші республикаға өту дегенді білдіреді деп жүрміз. Екінші республиканың болашағы Ата Заңымызға енгізілетін 33 толықтырулар негізінде жүзеге асады. Оның басты бағыттары — Парламенттің нығаюы, жергілікті өзін-өзі басқару органдары өкілетінің кеңеюі, сайлау жүйесінің жаңа үдерісін жүзеге асыру және партиялық жүйені оңтайландыру.
Ата Заңға енгізілетін 33 өзгеріс негізінде елімізде Конституциялық сот пайда болады. Енді құқығы бұзылған жағдайда кез келген қазақстандық Конституциялық сотқа жүгіне алады. Бұрын елімізде көппартиялылық жүйесі болғанымен, негізгі құрылым бір партияға басымдық беріп келді. Енді пайда болатын жаңа партиялар елімізде саяси бәсекелестікті арттыруға, демократияны дамытуға негіз болары сөзсіз. Жаңа Қазақстанды құруға бағытталған реформалардың жүзеге асуы үшін референдумда әр қазақстандықтың дауысы маңызды.
Арап ЕСПЕНБЕТОВ,
филология ғылымдарының докторы, профессор, ҚР еңбек сіңірген қайраткері
