Semeytany.kz – Мәжіліс депутаты Серік Ерубаев әскерге шақырылуға жарамды жастардың жартысынан азы ғана қызметке алынатынын айтып, әскери борышын өтемегендерді дрон және пилотсыз технологиялармен жұмыс істеуге міндетті түрде оқытуды ұсынды, деп жазды Arasha.kz.
«Ақ жол» демократиялық партиясының орталық кеңсесінде пилотсыз авиациялық жүйелерді дамыту мәселесіне арналған кездесу өтті. Жиынға Қорғаныс министрлігі өкілдері, салалық мамандар және дрон технологиясын өндіретін компаниялар қатысты. Кездесу жайлы партия төрағасы Азат Перуашев өзінің Telegram-арнасында жазды.
«БАС құзыреттілік орталығы» ЖШС директоры Абзал Ерубаевтың айтуынша, Қазақстанда 10 мыңнан астам дрон бар, алайда ресми сертификатталған операторлардың саны шамамен мыңның төңірегінде ғана. Дрондардың бақылаусыз әрі реттелмеген қолданылуы азаматтық авиацияға, электр желілеріне, өнеркәсіптік және тұрғын үй нысандарының қауіпсіздігіне қатер төндіруі мүмкін.
Жастар арасында дрон технологиясына қызығушылық жоғары болғанымен, оларды жүйелі оқытуға бөлінетін қаражат жеткіліксіз. Бұл білім беру, ауыл шаруашылығы, су ресурстары, өнеркәсіп, құрылыс, энергетика, мәдениет пен спорт, цифрлық даму және ішкі істер ведомстволары тарапынан қаржыландырудың шектеулі болуымен байланысты.
Осыған орай депутат Серік Ерубаев балама ұсыныс айтты. Оның сөзінше:
– әскерге жарамды жастардың тек аз бөлігі ғана әскер қатарына шақырылады;
– алайда олардың елеулі бөлігі компьютерлік ойындар мен технологияға әуес.
Сондықтан депутат әскери қызметке алынбаған жастарға өнеркәсіп пен ауыл шаруашылығында қолданылатын дрондармен және басқа да пилотсыз жүйелермен жұмыс істеуді міндетті түрде үйретуді қарастыру керек деп санайды. Ұсынысқа сәйкес, мұндай курс ақысы жастардың өз есебінен төленуі мүмкін, ал оқу бағдарламасына ұшқышсыз ұшу аппараттарынан бөлек өндірістік бағыттағы заманауи пилотсыз технологиялар да енгізілмек.
