Бүгін еліміздің барлық мектептерінде соңғы қоңырау соғылды. Биыл салтанатты жиындар екі жылғы үзілістен кейін дәстүрлі форматта өткізіліп отыр.
Семей қаласының әкімі Бақытжан Байахметов № 37 гимназиядағы салтанатты жиынға қатысты. Гимназия биыл өзінің 30 жылдығын атап өтеді. Аталмыш оқу орны мерейтойлық күнді жақсы жетістіктермен қарсы алуда. 1258 оқушының 337-і — оқу озаттары.
Ағымдағы жылы гимназияның 43 оқушысы «Гимназия мақтанышы» медаліне ие болды.
Тоқтарғазы Әлихан ағылшын тілі бойынша республикалық олимпиадада 1-орынды жеңіп алды. Талғат Дайян және Дильназ Нұрмұхаметова құқық негіздері пәні бойынша жүлделі орындарға ие болды. «Зерде» республикалық ғылыми жұмыстар байқауында Дариға Тұрсынғазы 2-орынды иеленді.
Бүгін осы гимназияның 86 түлегі үшін соңғы қоңырау соғылды. Олардың бесеуі — «Алтын белгіге», он екісі — үздік аттестатқа үміткерлер.
Семей қаласының әкімі түлектерге жылы лебізін білдірді.
«Жыл сайын оқудағы табыстарыңызбен сіздер еліміздің дамуына лайықты үлес қосасыздар. Президент Қасым-Жомарт Тоқаевтың тікелей тапсырмасы бойынша барлық жерде мектептердің материалдық-техникалық базасы жақсарып, жаңа технологиялар пайдаланылуда. Оқушы сапалы білім алуы үшін барлық жағдай жасалуда», — деді Бақытжан Байахметов.
Биылғы оқу жылында Семейдің бір жарым мыңға жуық оқушысы халықаралық, республикалық және облыстық олимпиадалар мен конкурстардың жеңімпаздары атанды.
Қала әкімі оқушыларды лайықты тәрбиелеуе және оларға қажетті білім мен шабыт беруде барлық күш-жігерін салған мұғалімдерге ерекше алғысын білдірді. Түлектердің ата-аналарына да жылы сөздер айтылды:
«Бүгін оқушылардың мектепті лайықты бітіріп, жақсы базалық білім алып, түрлі байқауларда жеңіске жетуі – бұл мұғалімдердің де, ата-аналардың да ортақ жетістігі», — деп атап өтті Бақытжан Байахметов.
Қала әкімі гимназияның үздік ұстаздарына құрмет грамоталарын тапсырды. Марапатталғандардың арасында директордың тәрбие ісі жөніндегі орынбасары Шынар Тұрсынбаева мен тарих пәнінің мұғалімі Гүлжан Мұхамедиева да бар.
Қала әкімі өз сөзінде ел Президентінің бастамасымен Жаңа Қазақстанды құрудың негізі қаланатындығын және мұның жауапты кезеңдерінің бірі бүкілхалықтық референдум екендігін айтты.
Бақытжан Байахметов 5 маусымда халық референдумға белсенді қатысып, дұрыс таңдау жасайтынына сенімін білдірді.
Айта кетейік, бүгінде Семейдің 66 мектебінде 48 622 оқушы білім алуда. Оның ішінде 1970 түлек мектеп бітірді. Алдын ала мәліметтер бойынша, ҰБТ-ны – 1586 түлек (немесе 80,5%) тапсырады.
«Алтын белгіге» 45, ал үздік аттестатқа 141 түлек үміткер.
Өмірұзақ ЖҰМАҚАНҰЛЫ
