Ағымдағы жылы Семейдегі білім ордаларын жөндеуге 500 млн теңге бөлінді. Сонымен қатар күрделі жөндеу жұмыстарын жүргізуге қосымша 111 млн теңге қарастырылған. Бұл туралы Семей қаласының ақпараттық орталығында өткен баспасөз конференциясы барысында Семей қалалық білім бөлімінің басшысы Наталия Фесенко кеңінен тарқатып айтып берді.
— Бізде әрбір мектеп жан басы бойынша қаржыландырылады. Қамқоршылық кеңесімен мектеп бөлінген қаржыны қайда жұмсайтынын өздері шешеді. № 11 мектептің жылу жүйесін жөндеу қажет, №№17 және 40 мектептердің шатырлары күрделі жөндеуді қажет етеді. №36 мектепке ағымды жөндеу жүргізу керек. Сонымен қатар жаңа интерактивті, инновациялы және STEM-кабинеттері сатылып алынады, – деді Наталия Фесенко.
Мектепке қажетті жиһаздар сатып алуға қаражат бөлінеді.
— Соңғы он жылда біздің мектептерге жиһаз сирек сатылып алынды, кей жерлерде олардың тозығы жетіп, істен шығып жатыр. Биылғы жылы жиһаз сатып алу жалғасады. Өткен жылы 8 – 10 жиһаз жиынтығы сатылып алынды, биылғы жылы осы мақсатқа 88 млн теңге бөлінді, – деп нақтылады білім бөлімінің басшысы.
Бүгін барлық білім мекемелерінде соңғы қоңырау соғылды. Алайда оқу жылы аяқталған жоқ. 1 маусымнан 1 тамызға дейінгі аралықта қалада Жазғы мектептер жұмыс істейді.
Жазғы мектептерге оқушылар ата-аналарының қалауы бойынша екі ауысымда бара алады. Ол жерде әр оқушы өз білімін жетілдіремін деген пәнді таңдай алады. Сонымен қатар маусымнан бастап мектеп жанындағы және қала сыртындағы лагерьлер жұмыс істейді.
— Сонымен қатар қосымша білім беру мекемелерінде – музыкалық мектепте, балалар өнер мектебі және биологиялық орталық базасында жазғы лагерьлер ұйымдастырылады. Жастар мен балалардың шығармашылық сарайында, сондай-ақ инновациялық технологиялар мектебінде де жазғы балалар алаңын ұйымдастырылады. Сонымен қатар колледждер базасында 8-сынып оқушылары үшін кәсіптік бағдарлау алаңдары жұмыс істейді. Ол жерде оқушылар сол колледждегі мамандықтармен танысады, дайындықтан өтеді. Жазғы лагерлерьге тоқталсақ, олардың саны артқан жоқ. Лагерьлерде жөндеу жұмыстары жүргізілген, бағдарламалар әзірленді, топ жетекшілері дайындықтан өтті. Қала сыртындағы лагерьлер маусым айының ортасынан жұмысын бастайды, — деп толықтырды сөзін Наталия Фесенко.
Биылғы жылы оқушылар демалыс уақыттарын «Радуга», «Түрксиб», «Жас Қанат» лагерьлерінде, «Достық» спорттық лагерінде және № 3 балалар үйінің лагерінде өткізе алады.
Анар АХМЕТҚАЛИЕВА,
«Семей таңы»
