Семей қаласы әкімдігінде өткен жиында сәулет және қала құрылысы бөлімінің қаланың сәулеттік келбетін жақсарту бағытында атқарылып жатқан жұмыстар туралы есебі тыңдалды.
Бас жоспардың негізінде қаланың оң жағалауы мен сол жағалауы бөліктерін белгіленген тәртіппен егжей-тегжейлі жоспарлау жобалары әзірленіп, бекітілді.
Қала маңындағы аумақтарда жалпы ауданы 4574,2 гектар болатын он екі тұрғын үй алабы анықталған, бұл жеке тұрғын үй және әлеуметтік мақсаттағы объектілер құрылысына арналған 17 543 жер учаскесі. Сондай-ақ Шығыс кентінің сол және оң жақ саяжай алаптарын егжей-тегжейлі жоспарлау жобаларын әзірлеу жұмыстары да басталған. Бүгінде Қарағайлы тұрғын ауданында құрылыс жұмыстары белсенді жүргізілуде. 22 бюджеттік үй салынуда. 13 коммерциялық тұрғын үйдің құрылысы жүргізілуде. Көп қабатты тұрғын үйлердің 18 жобасы әзірленсе, 33 жоба әзірленуде. Көп қабатты тұрғын үйлердің қасбеттері осы ауданның заманауи талаптары мен көлемдік-кеңістіктік шешімі ескеріле отырып жасалған.
Семей қаласының сәулеттік келбетін жақсарту үшін қаланың орталық бөлігінде орналасқан көп қабатты тұрғын үйлер қасбеттерінің эскиздік жобалары әзірленді. Ескі қасбеттері бар көп қабатты тұрғын үйлердің 30-дан астам эскиздері іріктеліп алынған. Бірінші кезеңде Шәкәрім даңғылы бойынша жағалаудан бастап теміржол вокзалына дейін 19 эскиздік нұсқа мақұлданды.
Тұрғын үй инспекциясы бөлімі конкурс жариялады, қалпына келтіру жұмыстары ағымдағы жылға жоспарланған. Сәуір және мамыр айлары аралығында бөлім тарапынан іргелес аумақты абаттандыру және жинауға байланысты түсіндіру жұмыстары жүргізілді, кәсіпкерлік субъектілері, әлеуметтік және көлік инфрақұрылымы объектілеріне 480-ге жуық хабарлама табыс етілді.
Қала әкімі сәулет және қала құрылысы бөлімінің жұмысына наразылығын білдірді.
«Біз қасбеттерді жасаймыз делік. Іргелес аумақты абаттандыру бойынша қандай жұмыстар жүргізілуде? Ескірген жиектерді, тозған тастарды, жасыл желекті ауыстыру керек пе? Бөлім кәсіпкерлік субъектілеріне аумақты рәсімдеудің эскиздік жобаларын ұсынды ма?» — қала әкімінің бірқатар сұрақтары жауапсыз қалды.
Бақытжан Байахметов сәулет келбеті жағынан Семейді дамыту тұжырымдамасының жоқтығына байланысты ескерту жасады.
«Кейбір орталық даңғылдар қала көшесіне ұқсамайды. Ағаштарды санитарлық кесу жұмыстары жүргізілмейді. Біз ғасырлар бойғы ағаштарды тамырымен жоямыз да олардың орнына тамыр жаятыны белгісіз нәзік көшеттер отырғызамыз. Қаладағы ең көп жүретін көшелердің бірі Дулатов көшесінде тротуарлар салына бастады, ал олардан шығатын бөліктерін кімдер жасайды? Бөлімнің жұмысы қанағаттанарлықсыз деп танылсын», — деп түйіндеді қала басшысы.
Жағдайды түзетуге сәулет және қала құрылысы бөліміне үш күн берілді.
Семей қаласы әкімінің баспасөз қызметі
