Өткен аптаның соңында облыстық мәслихаттың кезектен тыс сессиясы өтті, оған шығыс өңірінің барлық депутаттары толықтай дерлік қатысты. Бұл жиынды тарихи кеңес болды десек, артық етпес.
Алдағы сәрсенбі, 8 маусымда Абай облысы мәслихатының бірінші сессиясы өтеді. Осыған орай сессияда жаңа облыстың даму қорытындылары мен келешегі жан-жақты талқыланды.
— Барлық көрсеткіштер бойынша қарқынды өсу және экономикаға инвестициялар белсенді тартылып жатқанын атап өткім келеді. Соңғы бірнеше жылда Абай облысына, орталығы Семей қаласына 2,1 триллион теңге, облыстық және республикалық бюджеттен 353,9 миллиард теңге инвестиция тартылды. Ақтоғай және Бақыршық кен-байыту комбинаты, май экстракциялық зауыты сияқты ірі жобалар белсенді іске асырылуда. Тұрғын үй құрылысының қарқыны артып келеді, тек өткен жылдың өзінде 326 мың шаршы метр тұрғын үй пайдалануға берілді. Қарағайлы шағын ауданында 20 мектеп, 4 балабақша, 13 спорт нысаны, соның ішінде бірегей көпфункционалды спорттық-мәдени кешен салынды. Денсаулық сақтау саласында да ілгері даму байқалады. Атап айтсақ, елдегі алғашқы радионуклидтік терапия бөлімшесі бар Ядролық медицина орталығы ашылды. Мемлекеттік-жеке меншік әріптестік шеңберінде 79 жоба, Еуропалық қайта құру және даму банкі желісі бойынша 4 жоба іске асырылуда, — деп атап өтті облыс әкімі Даниал Ахметов.
Сөз орайында айта кетсек, 2020 жылдан бастап Мемлекет басшысы Қасым-Жомарт Кемелұлы Тоқаевтың тапсырмасы бойынша қаржыландыру көлемі 260 млрд теңгені құрайтын Семей қаласын әлеуметтік-экономикалық дамытудың бесжылдық кешенді жоспары іске асырылуда. Жоспарға сәйкес, бір жыл ішінде 107 млрд теңге сомасына жобалар іске асырылды. Алдағы төрт жылға жобалар бойынша сметалық құжаттар әзірленді.
— Өңір дамуы аталмыш көрсеткіштермен шектелмейді. Мен өз кезегімде Абай облысы депутаттарының ел игілігі жолындағы жауапты қызметтеріне табыс тілеймін, — деді қорытынды сөзінде Шығыс Қазақстан облысының әкімі Даниал Ахметов.
Әлібек КЕМЕЛХАН,
«Семей таңы»
