Кеше, 8 маусым күні, Семей қаласы әкімдігінде облыстық мәслихаттың алғашқы сессиясы өтті. Сессия отырысына Абай облысы мәслихатының депутаттары, БАҚ өкілдері және онлайн режімде облыс құрамындағы аудандардың әкімдері қатысты.
Президент Қасым-Жомат Тоқаев 16 наурыз күнгі Жолдауында елде жаңадан үш облыс құрылатынын мәлім еткен болатын. Мемлекет басшысының Абай, Ұлытау және Жетісу облыстарын құру туралы қаулысы 8 маусымнан бастап ресми түрде күшіне енді.
Бұған дейін басылым беттерінде Шығыс Қазақстан облысы мәслихатының кезектен тыс XVI сессиясы өтіп, депутаттық корпусты бөлу жөніндегі шешімнің жобасы мақұлданғаны хабарланған болатын.
Абай облысы мәслихатының депутаттық құрамына 16 адам бекітілді. Олар: Бесқарағай ауданының «Тіл үйрету орталығы» КММ директоры Айнаш Әменова, «Роза ВВК» ЖШС директоры Альбина Ахметова, «Sembell» ЖШС бас директоры Серік Байғалиев, ШҚО әкімінің штаттан тыс кеңесшісі, «Шығыс — Адалдық алаңы» жобалық кеңсесінің жетекшісі Маржан Бақыт, «Елім-ай Көкпекті» ЖШС директоры Болат Бекбердинов, «СемАз» ЖШС бас директоры Әсемқан Досқожанов, «Е.Зайтенов» шаруа қожалығының басшысы Ерлан Зайтенов, «Силикат» ЖШС бас директоры Жұмабек Ибраев, «Юбилейный» ЖШС басшысы Мамырбек Қарашев, «Көлік колледжі» КМҚК директоры Айбек Нұғымаров, «Казполиграф» ЖШС бас директоры Темірлан Оралбаев,
«Защита» теміржол станциясының отын қоймасының бастығы Қанат Оспанов, «Теплокоммунэнерго» КМҚК директоры Азат Сарпеков, «Шалабай» ЖШС бас директоры Қуаныш Сүлейменов, «Агрофирма «Приречное» ЖШС директоры Мұхит Тұмабаев, «Қарағайлы» Семей медициналық-әлеуметтік мекемесінің медицина бөлімшесінің меңгерушісі Шолпан Шегедекова.
Сессияның күн тәртібінде Абай облыстық мәслихатының хатшысын сайлау, мәслихаттың тұрақты комиссияларын құру және оның мүшелерін сайлау, тұрақты комиссияларының төрағаларын сайлау мәселелері, сонымен бірге мәслихат регламентін бекіту және «Абай облысы мәслихатының аппараты» мемлекеттік мекемесі туралы ережені бекіту, оның құрылымы мен шарттары туралы мәселелер қаралды.
Алдымен депутаттар Абай облыстық мәслихатының хатшысын сайлады. Депуттатардың бір ауыздан қолдауымен мәслихат хатшысы болып Қуаныш Сүлейменов сайланды.
Қуаныш Серқазыұлы 1973 жылы Семей облысының Шар қаласында дүниеге келген. Семей мемлекеттік университетінің тарих факультетін бітірген ол білімін Қазақ мемлекеттік заң академиясында жалғастырып, Семей қаласындағы Шәкәрім атындағы университетте «Мал шаруашылығы өнімдерін өндіру технологиясы» мамандығы бойынша тамамдаған. Ұзақ жылдар бойы білім беру саласында қызмет етті. Қазіргі таңда асыл тұқымды мал өсірумен айналысатын «Шалабай» жеке шаруашылығы серіктестігінің бас директоры.
Сессияда екі тұрақты комиссия құрылды. Бюджет, экономика, өңірлік даму, Төрелік іс жүргізу кодексі, экология және табиғатты пайдалану мәселелері жөніндегі комиссияның төрағасы болып «СемАз» жауапкершілігі шектеулі серіктестігінің бас директоры Әсемқан Досқожанов сайланды. Әлеуметтік-мәдени даму, депутаттық өкілеттік, этика және заңдылық мәселелері жөніндегі комиссия төрайымы болып «Роза ВВК» ЖШС директоры Альбина Ахметова сайланды.
Сондай-ақ Абай облыстық мәслихатының депутаттары Мәслихат аппараты туралы ережені, оның құрылымы мен штатын бекітті.
Әйгерім СӘРСЕНҚАЛИ,
«Семей таңы»
