Семей қаласының әкімі Бақытжан Байахметов жуырда Ертіс өзенінің ортасындағы Бейбітшілік аралының жағдайына қатысты әкімдіктің тиісті бөлімдері басшыларымен арнайы кеңес өткізді.
Бүгінде Бейбітшілік аралы өзінің бірегейлігімен қаланың көрікті жерлерінің бірі ғана емес, тұрғындардың сүйікті демалыс орнына айналған.
Мұнда «Өлімнен де күшті» монументінің жанында жыл сайын 29 тамызда Семей ядролық сынақ полигонының жабылуына арналған халықаралық акциялар өткізіледі, оған шетелдік делегациялар да қатысады. Семей қаласына облыс орталығы мәртебесі қайтарылды, енді бұл тарихи маңызы бар арал қаламыздың бетке ұстар орындарының бірі болуға тиіс.
Аталған жиында айтылғандай, қазіргі күні аралдағы ескерткіштер кешенінің жағдайы көңіл қуантарлық емес. Ескерткіштердің плиткалары түсіп жатыр, төселген тастар бүлінген, жиектерді ауыстыру қажет. Сонымен қатар, аралдың экоклиматына зиян келтірмей, жалпы келбетін жаңарту керек.
Кеңес барысында қала әкімі Бақытжан Кәкенқажыұлы сәулет және қала құрылысы бөліміне ескерткіштердің маңына, сондай-ақ жалпы арал аумағында ағымдағы жөндеу жүргізу жұмыстары бойынша арнайы ұсыныстар дайындауды тапсырды.
— Семей қаласы өзінің жаңа мәртебесіне сәйкес қонақтарды тиісті деңгейде қарсы алуы керек, — деді шаһар басшысы.
«СТ» — ақпарат
