Медицина саласы қызметкерлері мерекесі қарсаңында қала әкімі Бақытжан Байахметов бірқатар дәрігерлерге пәтер кілттерін тапсырды.
Мемлекет иелігіндегі қызметтік баспаналар бейінді дәрігерлер отбасыларына берілді.
— Дәрігер мамандығы қай заманда болмасын қадірлі, сыйлы болған. Адамдармен жұмыс істеу оңай емес. Бұл кәсіп жан-тәнімен беріліп еңбек етуді, терең білімді, жоғары біліктілікті талап етеді. Сондықтан сіздер алдарыңызға көмек сұрап келген адамға ерекше мейірім танытып, әр пациентке мұқият қарайсыздар. Дәрігерлердің қадірін әсіресе пандемия кезінде ерекше түсіндік. Сіздер осы бір қиын-қыстау кезеңде қала тұрғындарының өмірі мен денсаулығын сақтап қалу үшін бар күш-жігерлеріңізді салып, күн-түн демей еңбек еттіңіздер. Сіздердің адал еңбектеріңізді жоғары бағалаймыз және құрметтейміз.
Дендеріңізге саулық, отбасыларыңызға амандық, қызметтеріңізге табыс тілеймін!
Соңғы жылдары облысымыздағы, қаламыздағы ауруханалар жаңа заманауи техникалармен қамтамасыз етілуде. Бірақ мамандардың орны бөлек,- деп атап өтті қала әкімі.
Бақытжан Кәкенқажыұлы мемлекет тарапынан медицина саласында қызмет ететін мамандарға әлеуметтік қолдау көрсетіліп келе жатқанын да айтып өтті.
— Денсаулық сақтау саласы жылдан-жылға дамып келеді. Қазіргі күні азаматтарымызға ешқайда барудың қажеті жоқ, медициналық қызметтер қолжетімді бола түсті. Кәсіби біліктілігі жоғары мамандарымыз бар. Біз бұған өте қуаныштымыз,- деп түйіндеді сөзін қала басшысы.
Баспана кілттері Семей қаласына аса қажет онколог, химиотерапевт, рентгенолог және неонатолог сынды мамандаға берілді.
Анар АХМЕТҚАЛИЕВА,
«Семей таңы»
