Биыл Көкпекті ауданында экономиканы дамыту және жаңа жұмыс орындарын құру мақсатында бірқатар маңызды жобаларды жүзеге асыру жоспарланып отыр. Негізгі міндеттердің бірі өткен жылы басталған инвестициялық жобаларды толық аяқтап, олардың тиімді жұмыс істеуін қамтамасыз ету. Бұл туралы Өңірлік коммуникациялар қызметі алаңында өткен баспасөз маслихатында Көкпекті ауданының әкімі Нұрбек Қошқарбаев мәлімдеді.
Ауданның туристік және көлік инфрақұрылымын дамыту бағытында Омбы – Майқапшағай республикалық маңызы бар автомобиль жолының бойында 3 кемпинг кешенін салу көзделген. Бұл кешендердің құрамында жаңар-жағармай станциялары мен қонақ үйлер болады. Аталған жоба жол бойындағы сервисті дамытуға және туристер мен жолаушыларға қолайлы жағдай жасауға бағытталған.
-Экологиялық қауіпсіздік мәселесі де назардан тыс қалған жоқ. Қазіргі уақытта Көкпекті ауылындағы қатты тұрмыстық қалдықтар полигонын қалпына келтіріп, қалдықтарды реттеу және қайта өңдеу жобасын іске қосу бойынша келіссөздер жүргізілуде.Өткен жылдары аудан аумағын абаттандыру және көгалдандыру жұмыстарына ерекше көңіл бөлінсе, биылдан бастап жаңа кезең өңдеу өнеркәсібін дамытуға басымдық берілуде. Осы бағытта ауданның барлық елді мекендерін қамтитын 3 жылдық даму жоспары әзірленді. Жоспарда өңдеу өнеркәсібін дамыту негізгі бағыттардың бірі ретінде белгіленген,- деді аудан әкімі.
Жеке инвесторлардың қатысуымен ауданда бірнеше жаңа өндірістік және кәсіпкерлік жобаларды іске асыру жоспарланып отыр. Атап айтқанда, күнбағыс майын өңдеу цехын салу, сүт өнімдері кешенін құру, балық өңдеу шағын зауытын ашу, наубайхана, қоғамдық монша, жиһаз цехы және шлак-құм блоктарын өндіру цехын іске қосу көзделген.
-Сонымен қатар, Тассай ауылындағы «Ағайынды» шаруа қожалығы базасында балық тұқымын өсіру шаруашылығы жобасы жүзеге асырылмақ. Қарағандыкөл ауылында шағын құс фабрикасын салу, Теректі ауылында көлік жуу орталығын ашу жоспарланған.Ауыл шаруашылығы саласында да жаңа бастамалар бар. Шұғылбай ауылында «Ататек» шаруа қожалығы базасында еділбай тұқымды қой өсіру жобасы жүзеге асырылады. Сонымен қатар, ауыл тұрғыны «Дастан» шаруа қожалығы базасында мал сою пунктін салу көзделді,- деп атап өтті Нұрбек Қошқарбаев.
Кәсіпкерлік инфрақұрылымды дамыту мақсатында Көкпекті ауылында бизнес орталық пен супермаркет құрылысы жоспарланып отыр. Ал Үлкенбөкен ауылында жол бойындағы сауда нысандарын дамыту қолға алынбақ.
