Мұқанова Зарқия Мұқатайқызы 1919 жылы 1-ші қаңтарда Бесқарағай ауданы Қоянбай ауылында дүниеге келген. Жастайынан еңбекке араласып, сұрапыл соғыс жылдары тылда жұмыс істеген. Зарқия әжей жеті балаға жарық дүние есігін ашқан алтын құрсақты ана. Қазір балаларының үшеуінің көзі тірі. Шаймардан есімді ұлы мен Қалимаш, Нұрилаш атты қыздары аналарына қамқоршы. Жастайынан тірліктің тауқыметін көп көрсе де, қайыспаған кейіпкеріміздің мінезінің қайсарылығы сөйлеген сөзінен білінеді. Қазір Зарқия әжеміз Нұрилаш есімді қызының қолында тұрып жатыр.
— Соғыс кезінде қиындық көрдік қой, бәріміз де. Тіпті, бізге әскери дайындықтан өтіп, жау әскеріне қарсы тұруды да үйрете бастады. Қаншама халық құрбан болды десеңші. Ойлап кетсең жаның түршігеді. Ендігі тілегім еліміз, Тәуелсіз Қазақстанымыздың іші-сырты тыныш болсын. Бейбітшілік мәңгі орнасын,-дейді Зарқия Мұқатайқызы.
{jcomments on}Жиендерін қосқанда Зарқия әжейдің 15 немересі бар. Қазір олардың ержеткендері еліміздің түкпір-түкпірінде оқу оқып, жұмыс істеуде. Алыста жүрсе де, әрі уақыттың тығыздығына қарамай, әжелерінің қал-жағдайын білуге жиі келіп тұрады екен.
Зарқия әжеймен сұхбаттасқанда алған әсеріміз ерекше. Әңгіме соңында биыл 95 жылдық мерейтойын атап өткелі отырған «Семей таңы» газетінің атынан келгенімізді айтқанда қарт кейіпкеріміз:
— Жас кезімізде «Социалды Шығыс», «Екпінді», «Семей правдасы» аталған бүгінгі «Семей таңы» газетін оқып, өңірдегі жаңалықтарды басылым беттерінен біліп отырғанбыз. Бұл ежелден халықтың тыныс-тіршілігіне назар аударып келе жатқан басылым. 95 жылдық мерейтойы құтты болсын, оқырмандары көбейе берсін, — деген аналық ақ тілегін жеткізді.
