«Қазақстан Республикасындағы жергілікті мемлекеттік басқару және өзін-өзі басқару туралы» Заңына сәйкес, Көкпекті аудандық мәслихаты депутаттарының келісімімен аудан әкімі қызметіне Ділдабек Тәжібайұлы Оразбаев тағайындалды.
Оразбаев Ділдәбек Тәжібайұлы — 1961 жылы 8 мамырда Төлеби ауданы, Қасқасу ауылында дүниеге келген. 1988 жылы Қазақтың Еңбек Қызыл Ту орденді ауыл шаруашылығы институтын ғалым агроном және 2009 жылы Алматы экономикалық университетін қаржы мамандықтары бойынша бітірген, экономика ғылымдарының кандидаты.
Еңбек жолын Оңтүстік Қазақстан облысы Ленгер ауданының Абай атындағы колхозында механизатор болып бастады. Әртүрлі жылдарда аталған ұжымшарда бас экономист, ұжымшар бригадирі, бас агроном, колхоз бастығы, Оңтүстік Қазақстан облысы Төлеби ауданы бойынша салық бөлімінде аға салық инспекторы болды.
Оңтүстік Қазақстан облысы табиғи ресурстар және табиғат пайдалануды реттеу басқармасының бастығы, басқарма бастығының орынбасары, департамент директорының орынбасары, басқарма бастығының міндетін атқарды.
Қазақстан Республикасы Ауыл шаруашылығы министрлігі Су ресурстары комитетінің «Шығыссушар» республикалық мемлекеттік кәсіпорнының директоры болды.
ҚР Ауыл шаруашылығы министрлігі Су ресурстары комитетінің «Қазсушар» республикалық мемлекеттік кәсіпорны Шығыс Қазақстан филиалының директоры, Шығыс Қазақстан облысы мәслихатының депутаты болып қызмет етті.
2013 жылдың 28 маусымынан бастап Шығыс Қазақстан облысы Тарбағатай ауданының әкімі болып қызметтерін атқарды.
2019 жылдың 15 сәуірінен бастап Шығыс Қазақстан облысы Аягөз ауданының әкімі болып тағайындалды.
2020 жылдың қыркүйек айынан бастап бүгінгі күнге дейін «Шығыс Қазақстан облысы орман шаруашылығы және жануарлар дүниесі аумақтық инспекциясы» РММ-нің басшысы болып жемісті еңбек етті.
Ал, ағымдағы жылдың 30-шы маусымынан бастап Көкпекті ауданының әкімі қызметіне кірісті.
Ділдабек Тәжібайұлының Көкпекті өңірін өркендету жолындағы алдағы қызметіне табыс тілейміз.
