Облыстық мәслихаттың кезектен тыс үшінші сессиясында Ақсуат пен Көкпекті аудандарының шекараларын белгілеу, облыс шекарасын өзгерту туралы ұсыныстар, әкімнің халықпен кездесулерін оңтайлы келістіру мәселелері қаралды. Сондай-ақ, мәжіліс депутаттары аппарат басшысына мекемелердегі «Шығыс Қазақстан» тақтайшаларының орнына «Абай облысы» деп ауыстыру мүмкіндігі қаралсын және басқармаларға келген азаматтардың жеке өмірбаяны толық жазылсын деген ұсыныстар тастады.
Ақсуат ауданының шекараларын белгілеу туралы Ақсуат ауданының әкімі Асхат Смаилов, Көкпекті ауданының шекараларын белгілеу туралы аудан әкімі Ділдәбек Оразбаев баяндады. Абай облысының ауылшаруашылығы және жер қатынастары басқармасы басшысының міндетін уақытша атқарушы Анзор Абаев облыс шекарасын өзгерту туралы ҚР әкімшілік-аумақтық құрылысының кейбір мәселелеріне Президент Жарлықтарын іске асыру мақсатындағы Абай облысының шекарасын белгілеу туралы Үкімет ұсынысының жобасын қарастыруды ұсынды.
Үшінші мәселе, облыс әкімінің осы жылдың ІІ жартыжылдығына арналған тұрақты кездесулерінің икемді кестесімен келісу туралы Абай облысы әкімі аппаратының басшысы Жасұлан Сәрсебаев айтып өтті.
Сонымен қатар, мәжіліс депутаттары Абай облысы әкімі аппаратының басшысы Жасұлан Сәрсебаевқа халықтың қозғап жүрген сұрақтарын жолдады. Бірінші ұсыныс – жеке және мемлекеттік мекемелер сынды барлық ұйымдар тақтайшаларын «Шығыс Қазақстан»-нан «Абай облысы»-на ауыстыру мүмкіндігін қарастыру. Екіншісі – құрылымдарда тиісті қызмет басшыларын тағайындау кезінде азаматтардың өмірбаяндарын ұсыну, бұл депутаттарға облыс басқармасына қандай азаматтар келгенін түсіндіру жұмыстарын жүргізуге мүмкіндік береді.
Дана Талғатбек
