Шығыс Қазақстан облысында хирургиялық ота жасайтын құрал-саймандар шығарылуы мүмкін. Мұндай құралдар өзімізде жасалатын болса, медициналық тауарлардың импорт көлемі азайып, мол қаржы елде қалады.
Шығыс Қазақстанда медицина саласын дамыту үшін шет елдерден заманауи жабдықтар сатылып алынып, ақ халаттылар Еуропа елдерінде біліктіліктерін арттыруда. Отандық медициналық өндіріс те назардан тыс қалмаған. Шығыс Қазақстанда хирургиялық құрал-саймандар шығару көзделуде. Бұл үшін Өскемендегі Д.Серікбаев атындағы ШҚТУ мен Семей медициналық университеті келісімге келіп отыр.
«Медициналық университеттің тиісті патенті бар. Олар бізге хабарласып, осындай жоба ұсынды. Хирургиялық ота жасайтын құрал-саймандардың түрін-түрін жасау жоспарланған. Бірақ ол үшін тиісті жабдықтар қажет. Қазір екі университет ақылдасып, атқарылатын жұмыс алгоритмін құрып жатырмыз. Содан кейін қаржы бөлетін инвестор іздейміз», — дейді Д.Серікбаев атындағы ШҚТУ ҚЕАҚ басқарма төрағасы — ректордың міндетін атқарушы Сәуле Рахметуллина.
Ал қазіргі күні техникалық университеттің ғалымдары адам ағзасына арналған медициналық импланттар жасап жатыр. Жоғары технологиялық жоба ШҚО басшысының қолдауымен іске асырылуда. Бұл жайлы жуырда ҚазАқпарат тілшісіне ШҚМТУ прототиптеу орталығының басшысы, ғалым Бағдат Азаматов айтып берді.
«Бұл жоба 2017 жылы қолға алынған. Университетіміз Өскемендегі Үлбі металлургия зауытымен және елордадағы Травматология және ортопедия ғылыми зерттеу университетімен бірлесіп осы бағытта еңбек етті. Нәтижесінде отандық импланттар жасау ісі жолға қойылған. Біздің травматология-ортопедия саласында қолданылатын импланттар шет елдікіне қарағанда біршама жетілген. Себебі отандық импланттарда металл құймаларының сапасы жоғары», – дейді Бағдат Азаматов.
Оның айтуынша, қазақстандық импланттар медицинада қолданыла бастаған. Алғаш рет импланттар Нұр-Сұлтан қаласының екі тұрғынына салынған. Қазір олардың жағдайлары жақсы. Жоба тестілеу мерзімінен өтуі үшін 30 ота жасалуы қажет.
«Медициналық импланттар жасау жобасының коммерциялық әлеуеті жоғары. Өйткені, негізінен, осындай оталар көп жасалады. Осы орайда облыс әкімі Даниал Ахметовтің бізге көрсеткен қолдауын ерекше атап өткен жөн. Бүгінде зерттеу институтының тапсырысы бойынша 8 түрлі имплант жасалды. Сапалы отандық импланттарды жасауға қажетті барлық мүмкіндіктер бар. Алда жоғары жетістіктерге қол жеткіземіз деп сенеміз», — дейді өз сөзінде Бағдат Азаматов.
Алдағы 3 жылда жобаны іске асыруға 5 млрд теңгеден астам қаражат бөлінген. Осы соманың 1,8 млрд-ы ғалымдар мен инженерлерге ғылыми зерттеу жұмыстарын жүргізуге және қажетті құрал-жабдықтарды сатып алуға жұмсалмақ.
«СТ» — ақпарат
