Қаламыздағы Олимпиада резервінің аймақтық спорт колледжі ғимаратында мүмкіндігі шектеулі жандарға арналған оңалту орталығы ашылды. Орталықтың ашылуына қалалық “Көмек” мүгедектер бірлестігі ассоциациясы мұрындық болған.
“Көмек” мүгедектер бірлестігі ассоциациясының вице-президенті Махмұд Сариевтің айтуынша, басты мақсат оңтайлы оңалту жұмыстарын жүргізу. Орталық Ресейдің медицина ғылымдары академиясы бағдарламасымен ҚР Денсаулық сақтау министрлігінің рұқсаттамасы негізінде жұмыс істейді. Ресейден орталыққа арнайы келіп қызмет етіп жатқан физиотерапевт-дәрігер Бакхат Қожахметұлының айтуынша, орталық тек қалпына келтіру, оңалту жұмыстарын жүргізеді.
— Денсаулықты қалпына келтіру үшін орталықта бірнеше кезеңнен тұратын кешенді жұмыс жүреді. Емдеу кезеңі алдымен – физио оңалту, иогатерапия жасаудан бастап нанотехнология көмегімен қан айналымын реттеу үшін анионды минералдар қабылдау, оттегі коктейлін және табиғи дәрумендерді қолдану мен психотерапия арқылы жүзеге асады,- дейді.
Кешенді жұмыс жүргізуге мұнда барлық мүмкіншілік бар. Қабылдауға келген науқас «Омега-Динамика» құрылғысының көмегімен алдымен толыққанды тексерістен өтеді. Су қараңғылық, сал, мүкіс жандар үшін әмбебап динамикалық «Дэнс» аппараты, Дэнс көзілдірігі мен «Остео» құрылғылары, денені қыздыратын тоқ төсек және басқа шет елден әкелінген заман талабына сай құрылғылардың қызметіне жүгінуге болады.
Оңалту орталығына күніне 10-15 адам қабылдауға келеді екен. Емдеу уақыты дертінің дәрежесіне байланысты. Тіпті, аз уақыттың ішінде бірнеше мүмкіндігі шектеулі жан оңалту орталығының оң жұмысының нәтижесінде қатарға да қосылған. Атап айтқанда, сал ауруына шалдыққан азамат кешенді оңалтудың нәтижесінде аяғынан тік тұрған екен. Ал, бүгінде тәулігіне 5-6 сағат ем қабылдап жүрген І топ мүгедегі оңалту орталығына келіп жүргелі көп өзгеріс болғандығын айтады.
{jcomments on}- Оңалту орталығына келіп жүргеніме бір жұма уақыт болды. Негізінен, біздер жылына
бір рет ауруханада жатып ем қабылдаймыз. Мұндай орталыққа алғаш рет келуім. Осы қысқа мерзімнің ішінде оң өзгеріс байқалуда. Бұрын басым жиі ауыратын. Қазір шүкір, жағдайым жақсырып қалғандай, — дейді Гүлмира Сиқымбаева.
Емделушісіне құрылғылар көмегімен оңалту жұмыстарын жасап жатқан медбике Әлия Мейрамғалиеваның айтуынша, кеудеден төмен қарай сал ауруына шалдыққан нау-қастың аяқтары алғашқы күндері еш қимылсыз, сезімсіз болған. Медбике алдағы уақытта аурудан айығудан үміт күтуге болатындығын айтты.
Ауруды жеңу үшін әр науқастың бойында рухани қайраттылық, өмірге деген құлшыныс болу керек. Дәрігер Б.Қожахметұлының басты қағидасы – мұнда келген әрбір адаммен сырласып, жан дүниесін түсіне отырып, өмірге деген құлшынысын арттыру. Екіншіден, ол иогатерапия арқылы қимыл-қозғалысты реттеу де маңызды ем түрі екенін тілге тиек етуде. Бұл мақсатта екі кең бөлменің бірі жабдықталып, жаттығу залына арналған.
Орталық ашуға қолайлы орын табылмаған шақта Олимпиада резервінің аймақтық спорт колледжі ғимаратынан аталмыш колледжің директоры Серік Тоқтарғазин бөлмелерді беріп, қол ұшын созған. Аталмыш орталық мүмкіндігі шектеулі жандарға арналғанын ескерсек, бұл — азаматтық іс.
Елбасы Н. Назарбаев Қазақстан халқына Жолдауында «Мүмкіндігі шектеулі азаматтарымызға көбірек көңіл бөлу керек. Олар үшін Қазақстан кедергісіз аймаққа айналуға тиіс. Қамқорлық көрсету – бұл өзіміздің және қоғам алдындағы біздің парызымыз» деген болатын. Ғимарат жағы тегін болғанымен, орталықты ашу ісін қолға алған “Көмек” мүгедектер бірлестігі ассоциациясының президенті Қабыш Дүтбаев пен вице-президенті Махмұд Сариев мұндағы барлық құрылғыларды өз күштерімен алған.
Алдағы уақытта оңалту орталығының жұмысын жандандыру үшін атымтай азаматтардан көмек болса, мүмкіндігі шектеулі жандардың денсаулығының оңалуына жол ашылар еді деген тілегін де жеткізді Махмұд Сариев сұхбат барысында.
Әйгерім СӘРСЕНҒАЛИ,
«Семей таңы»
