Халқымыз қашан да тарихи танымы терең, мекен еткен жерінің өткен-кеткені жайлы өздері ғана біліп қоймай, жұртшылыққа қарым-қабілетінше мағлұмат бере білген жандарды қадірлеуді парыз санаған. Жас ұрпаққа өнегелі өмірі мен атқарған істерін үлгі еткен. Есімдері жұрттың жүрегінде сақталып, жадында жаңғырып тұратындай етіп дүниеден озған соң да, айрықша құрмет көрсететіні тағы бар. Ежелден келе жатқан игі дәстүр бүгін де жалғасын табуда. Өткен аптада танымал өлкетанушы жерлесіміз Виктор Кашляктың құрметіне ескерткіш тақтаның ашылу салтанаты өтті.
Салтанатты жиында бірінші болып сөз алған қала әкімінің орынбасары Зәуреш Исабаева жиналғандарды ескерткіш тақтаның ашылуымен құттықтап, Виктор Николаевичтің қала тарихын зерттеуде сіңірген еңбегі жайлы айтып өтті.
— Бүгін біз өте мәртебелі міндетті іске асыру үшін жиналдық. Құрметті жерлесіміз, танымал өлкетанушының тұрған үйінде ескерткіш тақтаның ашылу салтанатына қатысып тұрмыз. Виктор Николаевич Кашляк қаламыздың дамуына көп үлес қосты. Мемлекеттік қызметте жүрсе де туған өлке тарихын зерттеу жұмыстарымен айналысуын тоқтатпады. Жас кезінен бастап ол бұрынғы Семей облысының, қала берді қала тарихына қатысты материалдар жинақтаумен айналысты. Бұрынғы одақ көлеміндегі көптеген мұрағаттармен, кітапханалармен және ғылыми институттармен белсенді түрде хат алмасып тұрды. Виктор Николаевич қала тарихына қатысты кітаптар топтамасын жазды. Олардың әрқайсысы бір-бір тақырыпты қамтыған, өлкенің шежіресінен мол хабар беретін құнды туындылар,-деді Зәуреш Рамазанқызы.
Алпыс екі жасына қараған шағында дүниеден озған зерттеуші Виктор Кашляк өз өмірінде оннан астам кітап пен 120-ға тарта мақала жазып қалдырды. Жақындарының, достарының айтуынша, жинақтап жарыққа шығарып үлгермеген материалының көлемі де біршама көрінеді. Ашылу салтанатында зерттеушінің кітаптарын қайта басып шығару туралы ұсыныс айтылды.
{jcomments on}Жиын барысында өлкетанушының жұбайы Наталья Вадимовна Кашляк та сөз сөйледі. Ол жарының азаматтық тұлғасы мен мінезінің жақсы қырлары жайлы айтып берді.
— Виктор Николаевич қаламызды өте қатты жақсы көретін. Өлке тарихын зерттеуді бірінші орынға қоюына осы мекен еткен жеріне деген шексіз сүйіспеншілік себеп болды. Соңына осыншама еңбек қалдырған жұбайымның есімін ардақтап, бүгін ескерткіш тақта орнатуға атсалысып отырған әріптестеріне, қала басшылығына алғысымды айтамын,-деді Наталья Вадимовна.
Өлкетанушының жазған еңбектерінің құндылығы жайлы тарих ғылымдарының кандидаты, профессор Исин Амантай Исаұлы мынадай пікір білдірді:
— Мемлекеттік қызметкер бола тұра Виктор Николаевич Семейдің арғы-бергі тарихыны зерттеумен белсенді түрде айналысқан. Мұрағаттарда құжаттарды жинап жүйелі жариялады. Тақырыптап, жеке-жеке кітаптап шығарды. Соның ішінде, «Семей қаласының көшелері», «Семей қаласының ғибадатханалары» сияқты еңбектері жұртшылықтың үлкен сұранысына ие. Бұл кісінің жазған кітаптары, жариялаған материалдары елімізден тыс алыс-жақын шетелдердегі өңіріміздің тарихына қызығушылық танытқан зерт- теушілер үшін өте құнды деп айтар едім.
Жиын соңында ескерткіш тақтаны ашу құрметі қала әкімінің орынбасары Зәуреш Исабаева мен өлкетанушының жұбайы Наталья Вадимовна Кашлякқа берілді.
Мирас ҚҰСАЙЫН,
«Семей таңы»
